il Chardun

revista  rumantscha independenta

CH - 7559 Tschlin

fon 081 866 36 76

IBAN CH

06/2011

Gonda Tuots sun passats...                    

 

Mô cur chi vain la prümavaira

Cur chi vain la stà

Cur chi vain l’utuon

E cur chi vain l’inviern

Dvaintan nouvas tias müraglias

 

Aint illa flur dals alossers

Aint illa crappa s-chodada dal sulai

Aint illa föglia gelgua dal baduogn

In la naivera e glatschera

Giran lur spierts

In erramaint

Cregns d’increschantüm

 

Tuots sun passats.

 

Luisa Famos                

 

es naschüda als 7 avuost 1930 a Ramosch.

Ella ha frequentà il Seminari da magisters a Cuoira e dat lura scoula primara a Sertig, Vnà, Dietikon ed Altstätten.

Maridada dal 1963 cun l’indschegner Jürg Pünter as renda ella bainbod a Honduras e Venezuela.

Dal 1972 tuorna la famiglia in Svizra e va a star a Bauen.

Ella es morta a Ramosch als 28 lügl 1974 cun be 44 ons.

 

Poesia: Gonda; Our da: Mumaints, Ediziun da l’autura, 1960;

Idiom: vallader;

On da registraziun: incuntschaint

 

 

 

 

 

 

05/2011

La pü bella rima                      

 

Da tuot las rimas cha scrivet

Cun mia vasta poesia

Ed eir da tauntas cha d’he let

Nu do que üna scu la sia.

 

Per tilla dir vuless que fögls

Cha nu tendschess cun mia bratscha

E sia rima es : quels ögls

In quella bella, chera fatscha.

 

Artur Caflisch                  

 

es naschieu als 16 gün 1893 a Zuoz.

Zieva il seminar da magisters a Cuira stüdis da musica, litteratura, art e filosofia; magister a Sta. Maria in Val Müstair ed a San Murezzan; editur da “La tevletta/La tabletta”; a partir dal 1936 scriptur liber a Zuoz; eir advocat, hom da politica e traductur.

El es mort als 31 meg 1971 a Samedan.

 

Poesia: La pü bella rima. Our da: L’ouvra litterera ed oters scrits, Uniun dals Grischs 1993.

Registraziun: 1952. TOP MEMORIA vol. 1. Lirica rumantscha. Radio Rumantsch, via da Masans 2, 7002 Cuira. www.rtr.ch

 

 

 

 

 

 

04/2011

Temma                   

 

Üna schlerna

dad uffants

sülla naiv

per sglischar

e

glera laint

da creschüts

per frenar

 

Clo Duri Bezzola                     

 

è naschì ils 14 da fanadur 1945 a Scuol.

Suenter il seminari a Cuira dat el scola a Segl e cuntinuescha lura ils studis a Turitg.

Quatter onns è el magister secundar a San Murezzan.

Davent dal 1975 dat el scola secundara ad Oetwil am See. El è confundatur e redactur da la revista “Litteratura”.

El è mort ils 17 d’avust 2004 a Männedorf.