12/2011

Ils temps s'han müdats; e'ls umans?        

 

L'on 1994 ha acceptà il pövel svizzer l'Iniziativa da las Alps ed ha incumbenzà quatras a la Confederaziun, da spostar successivamaing il trafic da camiuns sül binari dal tren e quai tenor ün urari prescrit. Ma adonta da quai traversan minch'on adüna daplü camiuns la Svizra ed inchargian l'atmosfera cun enormas quantitats da CO2. Il Cussagl federal e'l Parlamaint nu muossan gronda vöglia dad accumplir las pretaisas dal pövel. La cuolpa nu sun natüralmaing la lobby svizzra da camiuns e'ls strategs da l'Economie Suisse. Na, la cuolpa es l'Uniun Europea, respectivmaing ils contrats sbagliats dal Cussagl federal cun l'UE. Opla! Nun es la Svizra plü libra da decider? Adonta da la gronda skeptica invers l'Europa unida? Ma eu am less occupar da la dumonda, perche cha'ls camiuns van insomma in viadi, d'ingionder chi deriva il desideri da mobilità e dal marchà liber. "Tü nu poust müdar l'uman e neir il cuors da la vita moderna." "Sajast cuntaint, cha Tü nu vivast avant 50 ons!". Quistas frasas sto dudir quella o quel chi nun inclegia cha la magiurità dals umans chi vivan in noss grads da ladezza nu sun pronts da desister da lur pretaisas privatas invers ün standard da vita schmasürà. Ils camiuns van in viadi per accumplir las pretaisas dal marchà, voul dir da las consümentas e dals consüments. Ils eroplans svoulan perche cha tuot voul svolar in tuottas direcziuns dal muond. Blera glieud vivan sur lur relaziuns da finanzas perche cha las bancas mettan a disposiziun ils raps. "Il muond as rechatta hoz in ün stadi d'üna vaschia chi schmanatscha da schloppar" (New York Times). Ed ingün nu voul impedir quist svilup (la conferenza da clima da Durban lascha salüdar….).

"Tü nu poust müdar l'uman e neir na il cuors da la vita moderna". Bain cler: L'unic uman ch'eu poss müdar sun eu svess. E müdar il cuors da la vita moderna e cumbatter las differentas influenzas negativas? Quai bain! Eu n'ha vuschà per l'Iniziativa da las Alps. L'iniziativa es gnüda approvada fingià avant 17 ons – capità fin uossa nun es nüglia. Ün fat scuraschand! Uschè capita quai adüna darcheu. Ma almain possa esser cuntaint, cha no nu vain plü da viver sco avant 50 ons.

Propcha? Avant 50 ans d'eir'eu ün mattet a Zuoz. E sco oters cumüns d'eira eir Zuoz amo üna cumünanza i'l vair sen dal pled. Incredibla la spüerta da mansteranza pitschna e da commerzi da detagl: Il chalger Peter Domenig, la drogaria Tognoni, l'ufficina da velos Salzgeber, 2 affars da cuafför, Joggi Müller e Hans Müller, colonials Zimmermann, fierramainta Amstadt (cun üna schelta incredibla dad utensils) ils duos bachers Baschnonga e Robbi, butia Badilatti cul cafè muglinà da tant'Elsa, la posta in cumün cul cheu d'posta Schellenberg, e'l büro da la staziun da la viafier cun paraids plain bigliets e'l capo staziun Florio Tognoni. Ingüns automats, ma interessantas discussiuns. L'affar da fotografias Zimmermann ed ils "Jelmolis" dal cumün Bühler e Magni-Willy. Garaschas, falegnamarias, impraisas da fabrica ed impraisas secundaras da fabrica. Bott, Sonder, Casty, Lutta, Valär, Stuppan, Caflisch, Rüegg e sco cha tuots vaivan nom… E las ustarias Crusch Alba, Konda, Albanas, Stambuoch. I gniva fat amo politica al tavolin. Inschmanchabel per mai d'eira eir la lataria. Be quella vendaiva lat frais-ch e quai dürant ün'ura la saira. Perquai as fuormaivan adüna colonnas da glieud davant porta. Hozindi na da s'imaginar. Ma i d'eira l'occasiun per discuors. Televisiuns d'eiran propi be pacas in cumün. Las cuorsas da skis giaivna adüna a verer pro Tut (abitaziun in chasa dal daintist Rauch). La stüva d'eira stichida plaina e minchatant d'eira il purtret interruot. Temp per as recrear da la tensiun.

Quel temp d'eira main ectic, plü quiet. La società as basaiva sün solidarità e dependenza d'ün da tschel. La vita d'eira plü modesta, las pretaisas individualas bler plü pitschnas. Stöglia esser cuntaint, da na pü stuvair viver da quel temp? Brichafat!

Eu less giavüschar a las lecturas ed als lectuors per l'on nouv ün pà dal spiert da quella jada. Damain stress, modestia e damain pretaisas, ün pêr uras da quietezza sainza new media, leger ün cudesch, impizzar üna chandaila ed observar las stailas!

 

CASA

 

 

 

 

 

 

11/2011

I pudess ir eir oter                     

 

Che douvra l'uman per viver, respectivmaing che drets ha l'uman? Tenor il cuntschaint psicolog ed umanist Abraham Maslow daja trais bsögns elementars da l'uman: bsögns corporals, sgürezza e relaziuns socialas. Pro'ls bsögns corporals toccan respiraziun (ajer net), chod (vestimainta), baiver (aua da baiver netta), mangiar (nudritüra sana) e sön (quietezza, detensiun). La sgürzezza cumpiglia allogi/abitaziun, sandà, protecziun cunter privels, pasch ed uorden legal (ledschas, rituals). Pro las relaziuns: amicizchas, partenadi, amur, amur pel prossem, sexualità, chüra e communicaziun. Interessant: i manca la lavur e la fuormaziun.

Scha nus vivessan sün basa dals bsögns manzunats vessan tuot ils umans sün quist muond avuonda per viver, sainza guerras e fominas. Be las pretaisas schmasüradas dals umans da l'uschenomnà "prüm" muond impedischan ün'existenza sgürada da tuot ils abitants da quista terra. Nus pretendain la mobilità illimitada, la communicaziun abosoluta, ün standard da vita schmasürà. Quai ans vain dictà dals concerns mundials, da las bancas e da las medias. Sainza augmaint da l'economia, ingüna creschentscha dal prodot brüt social – e, sco consequenza; povertà! Dafatta ün exponent dal Parti socialdemocrat m'ha dumondà, sch'eu preferischa da viver in povertà siand ch'eu sun cunter ün augmaint permanent da l'economia? O bella quista!

Standard da vita nun ha da chefar bler cun qualità da vita. Precis sco'l fat, cha raps nu garantischan üna vita furtünada. "Il muond ha avuonda pels bsögns da minchün, ma na avuonda per l'arsaja da minchün", ha dit Mahatma Gandhi. Tschel di vaina gnü ün'interrupziun da la forza electrica da var quatter uras. Il computer, il telefon, la platta da cuschinar, la frais-chera, nüglia nu funcziunaiva plü. Temp per as far impissamaints sur da nos möd da viver e'l parair persunal da mai sur da mia dependenza dal spiert dal temp modern! Invezza n'haja güsta let il cudaschet da la pastra da Vrin, Pia Solèr "Die Weite fühlen". Üna vita absolutamaing impreschiunanta, modesta - ed admiraziun da mia vart. Ma eir l'editura dal cudaschet disch i'l epilog: "Eu poss be dir il seguaint: D'avair inscuntrà ad ella es ün regal". La cumprouva chi pudess ir eir oter!

 

CASA

 

 

 

 

 

 

10/2011

Tschernas pel parlamaint federal              

 

Eu vaiva stübgià bain, sch'eu dess far part insembel cun meis parti a las tschernas dals 23 october 2011. Eu vaiva meis dubis, na be pervi dad ün resultat debel da nossa glista, dimpersai pervi dal fat, da na pudair spordscher avuonda ideas nouvas per manar ün pà schlantsch in quistas tschernas e da motivar a glieud da far adöver da lur drets democratics. Ed uossa, fingià avant las tschernas la dischillusiun: Las prognosas prevezzan üna quota da vuschs dad 1,7 % (invezza dals 5 % culs quals i's vess fat quint) quai es ün desaster, ma na per mai dimpersai per l'avegnir da nossa società e nos planet ?. Na, la conclusiun plü seriusa es il fat, chi nu's müdarà nüglia – e quai eir pervi da la cumbatta electorala chi mira evidentamaing in quella direcziun. Be na müdar inguotta, e quai vegn dirigi dals partits pussants e da la pressa. Tuot quai chi nun es confuorm a las normas da la società es suspettus e nu vain perquai tematisà. Illas discussiuns pro'l radio e pro la televisiun as poja observar quai il meglder. Üna resposta na aspettada o subversiva - e fingià es manada la grascha: I nu's vegn plü a pled. Interessant d'eiran eir las discussiuns publicas cun candidatas e candidats dals divers partits. Güsta illa discussiun davart la forza atomara sun tuots dantettamaing da glistess avis sco eu. E lura la cuntinuaziun logica: Schi va per propostas dad alternativas effectivas, alura la negaziun e'l zappar al lö. Ed uschè vaja pro l'economia, pro la migraziun, pro'ls problems da la sandà publica, pro problems socials. E la schurnalista ingrazcha per la discussiuns interessanta – üna beffa! Almain ha fat ün candidat ün buna proposta sün la dumonda, che masüras ch'el prevezza per amegldrar la situaziun dal turissem in connex cul franc svizzer massa char. El ha propuonü, da scurznir las pajas dal persunal da l'hotelleria, el chi guadagnà sgüra daplü co 200'000 francs l'on. Sco dit: dischillusiun as derasa ed ün païn eir l'incletta per quellas e quels chi nu van a vuschar. I nu müda propi nüglia.

 

E, co vaiva dit Franz Hohler: Si sind alli so nätt……

 

CASA..

08/2011

Co vezza ün president da parti las tschernas?                    

 

Las tschernas sun il barometer dal pensar politic da la populaziun svizzra, almain da quella part da ca. 40 % chi van a vuschar. Blers elegian our da princip a candidatas ed a candidats chi rapreschaintan lur partits, oters as laschan influenzar da las champagnas dad elecziuns e vuschan per quellas e quels chi impromettan dad acclumplir ils giavüschs particulars. E quai maina alura a la situaziun ün pa abstrusa, cha bleras votantas e blers votants elegian cunter lur agens interess. Da tschella vart daja eir da quel(la)s chi nu tschernan our da princip ün parti eir scha precis quel parti rapreschantess lur interess. Natüralmaing cha la forza da finanzas dals singuls partits giova eir üna rolla pro las elecziuns.

Pigliain sco exaimpel quel parti chi s’occupa impustüt dal tema da l’immigraziun da glieud da l’ester, voul dir cunter immigrants da lavur ed asilants. Var 30 % vuscharan per quist parti, dimena il parti il plü ferm in Svizra. As dumandan quellas e quels chi chi chüra ad els i’ls ospidals, chi chi pulischa lur secrets publics, fabricha lur tunnels, lava gio ils plats i’ls restorants? O quels chi elegian il parti chi postulescha plü pac stadi e daplü libertats; natüralmaing cha quist parti es il prüm chi sbraja davo il stadi scha interess particulars sun pertocs. I manca la consequenza.

Ün fat interessant es eir quel, cha tenor üna retschercha independenta 50 % da la populaziun es da l’avis cha’ls verds sajan il parti il plü capabel per schoglier ils problems futurs, voul dir p.ex. ragiundscher il böt da la società da 2000 vats. Ma be var 10 % da las votantas e dals votants elegian als verds. In Grischun sarà quai faquint amo plü pac. Gio da tuot ha la glieud temma da stuvair desister a lur bainstanza eir scha ün’economia verda imprometta daplü qualità da vita. Ün oter argumaint sarà eir quel, cha’l parti verd es l’unica forza politica chi pretenda eir hoz üna commembranza da la Svizra pro l’Uniun europeica – üna pretaisa na fich populara ma – e quai as demuossarà tenor experts renomnats magari svelt – indispensabla.

 

CASA

07/2011

Nouvas dal professer W.W.                

 

Cun leger ils cudeschs dal professer pensiunà grischun W.W. am rechatta adüna in ün bogn alternand da sentimaints. Las ideas e’ls recepts da l’econom neoliberal dozan pel solit ün pà meis squitsch dal sang. Il cudesch il plü actual “Unabhängige Schweiz?” pissera però eir per surpraisas. Davo cha l’economia global-liberala ha fallà sün tuot ils nivels e cun stuvair constattar, cha las bancas perseguiteschan inavant üna politica da raps totalmaing absurda, ha uossa eir badà il professer chi nu va inavant uschè. Dandettamaing proclamescha el intervenziuns dal stadi ed el es persvas da l’importanza da la Banca naziunala. El criticha las bancas e la politica actuala da la Svizra. El nu vezza il sbagl da la svalütaziun da l’Euro invers il franc svizzer pro L’Uniun eurpea (UE), dimpersai pro l’isolaziun e pro la mancanza da solidarità da nos pajais. Ed uossa es eir el skeptic reguard la politica da las chaschas da pensiun e dal provedimaint social, sainza critichar però l’instituziun da las ouvras socialas cumprovadas sco la AVS e la SI (AHV/IV). Nouvs suns davart da la conscienzcha neoliberala!

La spranza, cha’l pövel svizzer vöglia entrar ill’UE ha'l dat sü. E perquai es el fich skeptic reguard l’avegnir da nos pajais. Perquai til vögl eu sustegner. Ma ch’el sustegna inavant fundamentalmaing l’idea derasada dal sistem petrifichà, cha l’economia stöglia crescher inavant minch’on per tants e tants pertschient, quai nu pudaina amo spettar. Il medem vala per seis sustegn na cundividibel per ouvras atomaras. Forsa cha’l prossem cudesch maina progress eir in quel reguard!

 

CASA

 

 

 

 

 

 

06/2011

L’incletta democratica dal PPS da l’Engiadin’Ota                  

 

Il PPS da l’Engiadin’Ota cumplondscha, cha la Glista Libra lascha güdichar la decisiun dal Cussagl cirquital reguard l’iniziativa “abitar in Engiadin’Ota” dal güdisch administrativ. Il gremi regiunal vaiva declerà l’iniziativa sco na-valabla. Pel PPS esa eir fingià cler, che cha’l güdisch decida: “Il güdisch administrativ declerarà eir el cun sgürezza, cha l’iniziativa nu saja valabla. El avisarà eir als iniziants, da na far abüs dal dret d’iniziativa per müdar ledschas da fabrica cumünalas”. 400 suottascripziuns sajan massa pac per pudair inoltrar ün’iniziativa dal circul. Materialmaing vaja per masüras sül chomp da las abitaziuns da vacanzas.

Il PPS metta dimena in dumonda ils drets democratics, voul dir il dret dad inchaminar la via giuridica in affars politics e la pussibiltà cha eir üna minorità po inoltrar ün’iniziativa. Be chi chi ha fingià svessa ramassà suottasripziuns sa, quantas fadias chi voul per ramassar 400 suottascripziuns in üna regiun.

La situaziun da predschs da fuond, chasas ed abitaziuns in Engiadin’Ota es dramatica. Masüras reguard abitaziuns da vacanzas fan nair dabsögn. Interessant esa, cha precis il PPS nu voul ingünas restricziuns sül chomp da la speculaziun cun spazi d’abitar e la vendita d’abitaziuns a glieud na domiciliada. Quel parti chi avertischa cun minch’occasiun dal privel dals “esters”. E schi gess davo las decisiuns “democraticas” dal pövel, alura vessan fingià dalönch da gnir inviadas masüras restrictivas da la poltica. Forsa cha’l güdisch renda attent eir a quel fat!

 

CASA

04/2011

Populissem                  

 

Tenor Wikipedia indichescha il pled “populissem” üna politica chi’s sfadia per la “vicinanza al pövel”, chi instrumentalisescha la malcuntantezza, temmas e conflicts per seis intent cun quai ch’ella appellescha a sentimaints e preschainta soluziuns simplas. Populissem vain defini eir sco üna fuorma da politica, chi prouva da mobilisar a cuorta vista vuschs da votantas e votants cun far impromischiuns na realisticas ma popularas. Quai va eir in direcziun dad opportunissem, chi nüzzaja üna pussibiltà favuraivla sainza resguard a consequenzas o ad aignas ideas dad aignas valuors a favur da l’agen avantag. Pro’l populissem nu vaja in prüma lingia be per üna popularità immediata dimpersai per installar üna lingia permanenta da conflict sül chomp politic.

Ün exaimpel per ün pupulissem classic es l’acziun acutuala da la “Pro idioms” cunter il rumantsch grischun. Quist agir clocca aint ün cuogn tanter la Rumantschia. Quai es prüma: ün pass inavo, eir reguard la punt linguistica e la cumünanza tanter las differentas regiuns rumantschas e seguonda: ün pass per diminuir las simpatias cha la Rumantschia gioda, na be pro las instanzas politicas chantunalas e federalas dimpersai eir pro tuot il rest da la populaziun svizzra, chi’s dumandarà, scha quai es il plü grond problem cha no abitants alpins retics vain.

Ün oter exaimpel es il profitar politicamaing da la catastrofa nucleara terribla da Fukushima. Dandettamaing voulan dafatta partits politics burgais avertir al grond privel dad implants d’energia atomars. Quai natüralmaing eir in vista a las elecziuns dal Parlamaint a Berna l’utuon chi vain.

Eir il sduvlar temma da “l’invasiun” da glieud estra tocca pro’l chapitel da populissem. Quist tema es ün instrumaint permanent per deraser ün clima da malsgürezza ed impedischa in fond üna discussiun radschunaivla in merit.

“Populissem es il reflex da l’incapacità o da l’impussibiltà, da manzunar e discuter cuntradicziuns socialas in üna situaziun preschainta, sainza cha l’actur politic sto perder la stima e’l respet o sto as suottametter ad ün process da müdamaint persunal e sainza perder pussanza persunala e politica.” (Rosa Luxemburg).

 

CASA

 

 

 

 

 

 

 

02/2011

Optimissem                  

 

Ün fat es cler: da scriver cunter il “mainstream”, voul dir cunter l’opiniun da la gronda massa significha pel solit eir, cha üna tala tendenza vain adüna colliada cun ün tschert pessimissem. Sch’eu scriv alch critic, alura sun eu ün pessimist. Eu vez nair impè da nu’m bazilar cul tema e da giodair la vita. La dumonda es alura adüna eir: nun hast oters problems? Quai chi demuossa, cha quella o quel chi dumonda sto eir avair problems, sch’el(la)a discuorra dad “oters problems”. Ma quels problems saran plütost detagls e nun han da chefar cun optimissem o pessimissem.

Mo schi lascha’m scriver hoz alch optimistic: Il Grond cussagl voul tour per mans la refuorma da las structuras fundamenatalas da nos chantun, tanter oter eir da fusiunar cumüns. Quai svaglia pro mai ün sentimaint optimistic, positiv, eir scha’l tempo da quist intent nun es defini. Il temp d’hoz pretenda la reorganisaziun da las structuras, quai dumonda d’üna vart la Confederaziun cun la politica regiunala, da tschella vart eir il Chantun chi po dafatta dictar fusiuns da cumüns, schi sto esser. Ed ün bel di sto quai esser e l’aspet optimistic in quist cas füss insè quel, cha’ls cumüns illas regiuns as fusiuneschan facultativmaing. Perquai lessa far la seguainta proposta cun üna tscherta nüanza optimistica: Fusiun dals cumüns in Engiadina bassa, uschè svelt sco pussibel. Üna regiun, ün district, ün cumün. Wow, quai füss üna! L’Engiadina bassa: preparada per l’avegnir, la vendschüda da la globalisaziun, che bellas vistas! Da la surfatscha nan füss quai faquint dafatta ün dals cumüns ils plü gronds in Svizra! E per garantir ün avegnir persistent sül chomp economic ed ecologic: Colliar ils cumüns Engiadina bassa e Val Müstair in üna regiun da biosfera. Muossar chi cha no eschan, innovativs e furbers! Quist’idea n’haja declerà cun grond entusiassem ad ün pruoder e che ha’l dit? Tü est ün vaira fantast, bler massa optimistic! Voilà :-(

 

CASA

 

 

 

 

 

 

 

01/2011

Respet               

 

Respet es üna fuorma d’üna relaziun interumana, as po referir però eir a bes-chas, gruppas, instituziuns o pajais. Üna tenuta da respet excluda sainza dubi ün cumport egoistic. Expressiuns chi stan in stret connex cul respet: Stima, arcugnuschentscha, autorità, toleranza, prudentscha. “Eu trat a mincha uman cun respet”. Respet invers il bankier chi ha speculà cun meis raps e perda tuot? “Eu n’ha respet dals politikers”. Cuntuot cha la gronda part nu politisescha tenor meis gust? Mobbing ed ümiliaziun sun p.ex. eir fuormas da mancanza da respet. E co esa scrit i’l preambel da nossa constituziun federala?

“Il pövel svizzer e’ls Chantuns, in respunsabiltà invers la creaziun, in premura da renovar la Confederaziun per rinforzar la libertà, la democrazia, l’independenza e la pasch in solidarità ed avertezza invers la cumünanza mundiala, in voluntà, da viver in respet e stima vicendaivla da viver la multifarità ill’unità, illa conscienza da las prestaziuns cumünaivlas e la respunsabiltà invers las generaziuns futuras, tscherta, cha liber es be chi chi fa adöver da la libertà e cha la fermezza dal pövel as masüra vi dal bainstar dals debels”.

Wow, che frasa! E che intenziuns curaschusas da noss antenats – e che cuntrast invers la realtà! Ma minchatant daja eir intimaziuns, p.ex. quist’istorgina chi’m ha fat impreschiun: Il curridur da passlung Dario C. s’ha sgobà cun üna reverenza classica davant tuot seis “fans” cun passar il böt sün l’Alpe Cermis illa Val di Fiemme. Quai davo üna etappa brutala, oters curriduors sun crodats insembel, stanglantats cumplettamaing. Ma’l Jauer ha respus il respet da seis admiratuors, cun respet!

 

CASA

il Chardun

revista  rumantscha independenta

CH - 7559 Tschlin

fon 081 866 36 76

IBAN CH