11/2012

Il pon                      

 

I nu da nüglia plü bel per mai sco da chaminar l'utuon aint il god sur il pon d'aguoglias da larsch. Lom es el, fa penna, savura bain ed es da bella culur. Meis pon d'or. Sch'i vess dad esser amo bel chod, tir eu oura stinfs e s-charpas e zaplin a pè nüd sur il pon da natüra d'utuon via. Quant bain as saintan mias soulas dals peis. Bainbod gnarà la naiv, svessa ün immens pon alb, e suogliarà il pon d'aguoglias. D'inviern in chasa stun eu jent giò sül pon serrà e chod, stallajada, e leg e scriv o fetsch la posa.

Chenüns pons daja insomma, am dumond eu tuot in ün dandet. I dà pons da lana, pons sintetics, pons persians e pons dals Berbers, pons tendüts, pons da stüva, pons da la stanza da durmir, pons dal bogn – e pons svolants. Ed inavant: il pon cotschen ed il pon suos-ch. Suos-ch i'l sen cha blers pons chi derivan da l'Asia vegnan prodüts d'uffants. Lavur malsana, privlusa e pajada minimalmaing e suot condiziuns da lavur sainza resguard als drets umans ed als drets d'uffants.

Lura am vegn amo adimmaint il pon dal clochard, part da seis pitschnischem possess material. Seis pon in fuorma d'ün grond toc da chartun o, schi va bain, in fuorma d'ün materatschin, til servind sco let per durmir suot üna punt da la cità.

Forsa s'insömgia il clochard da rivar sül pon svolant in üna megldra vita, forsa neir na. Impissond vi da tuot quai, am figür eu tuot in üna jada il pon da la prümavaira: müs-chel frais-ch e verdin, lom ed ümid, güst deliberà da la naiv. Ed eu poss darcheu traplignar sur ün müravglius pon da natüra via, sperond cha'l clochard in quel fratemp haja survivü e cha'ls uffants dals pons in Asia possan ir a scoula e giovar quant ch'els vöglian.

 

Regula Bücheler, Brail

 

 

 

 

 

 

10/2012

Tuot es suotsur                 

 

Mauncha be auncha cha la chaschiera cumainza a chanter "Jingle Bells, Jingle Bells, tralalalalaaa", alura schi cha vessans il regal... per nu dir la merda. E quella, in fuonz, vainsa già uossa. Ma schi! Chi per l'amur da Dieu ho vöglia da cumprer cullas pel bös-chin da Nadel aunz cha l'utuon ho cumanzo inandret? Las föglias nun haun niauncha auncha müdo culur cha'ns rian già incunter rennas e niculaus cuvierts da naiv artificiela! Cha'l dianzer sia, che capita? Stögli magari cumanzer ad ir in bikini a cumprer ils prüms regals da Nadel? Tuot es suotsur, l'inter chalender. Als 2 schner, cur cha'l bös-chin perda apaina apaina sias prümas aguoglias sechas, as chatta già narcissas e tulipaunas i'ls supermarchos. Ellas ans tiran gentilmaing adimmaint cha la prümavaira nun es pü luntauna. E cun la prümavaira chi riva, ha? La Paaasquaaa! E cun la Pasqua vegnan las leivriiinas e'ls öviiins. Ed uschè magl..ngiainsa già in schner ils prüms övs da Pasqua culurieus. Il pü tard in avrigl cumprainsa alura las raketas pels 1. avuost e scha pussibel eir las mascras per festager Halloween, ün'üsaunza "very swiss". Scu cun las festas e las üsaunzas vo que eir cun las mangiativas. Üja da l'Africa dal süd a Nadel, frejas our da la serra in favrer, mandarinas "in vitro" in avuost. Che gustus. Intaunt cha giaschains dimena al mer giodand qualche clementina, passa speravi ün Marocaun vstieu da San Niclò trand cun se ün charrin plain stichieu cun cullas glüschaintas. "Jingle Bells, Jingle Bells..." Glatscha? As dumandais scha'l Marocaun nu vess da vender glatscha? Ma sün che planet vivais! Chi mê pensa in lügl auncha vi da glatscha! Quella as mangia in december. Giand culs skis!

 

Bettina Secchi-Fluor

 

 

 

 

 

 

09/2012

La cartulina                 

 

Nossa Lisina ho cumplieu 95 ans dumengia passeda. Eau nu d'he scrit üngüna cartulina. Eau nu poss tauntüna na scriver que ch'eau La giavüsch da cour. Che vess'la dit sch'eau la vess scrit ch'eau la giavüsch ch'ella nu stöglia ir i'l asil dals vegls…u illa chesa da chüra … ch'eau la giavüsch ch'ella nu stöglia perder si'independenza e ch'üngün nu dess decider per ella che chi capita cun sia chesa… ch'eau la giavüsch ch'ella possa s'indrumanzer in sieu let, aunz cha vain il s-chür e'l fraid?

Eau nu vulaiva scriver cha que saja üna furtüna da gnir uschè vegl. Persunelmaing am fo que la sgrischur da penser cha vess da viver auncha 40 ans! Tuot tias amias e tieus amihs, cuntschaints e paraints d'üna vouta sun già morts. Eau nu poss m'imaginer quella situaziun. La vita e la cultura da las prosmas generaziuns nun inclegia Lisina propi bain. Ella es fich viva da spiert e vezza precis che chi capita, ma per ella es tuot üna ter dischillusiun, ella vezza valuors chi sun idas a perder. Già il möd da fer cumpras, da cuschiner, da's nudrir, da bütter mangiativas, vstieus e mobiglia per cumprer adüna nouva roba – tuot que nu la plescha. Lisina ho mobiglia fatta da falegnams, na rüzcha da l'IKEA. Ella nun inclegia quist materialissem sfreno. Lisina guarda regulermaing la televisiun e vezza eir che cha capita i'l muond. A voutas nu so'la pü durmir da tuot il mel e trist cha do. La surabundanza dad infurmaziuns la faun gnir stuorna. Cu mê la pudessi giavüscher auncha bgers ans tuot que?

La glista da las masdinas es lungia, ma Lisina es precisa e nu schmauncha üngünas. Culs mauns cumplettamaing defurmos dal reumatissem e da l'artrosa las ordinescha ella in üna s-chacclina e las piglia, scu prescrit dal meidi. Eau nu la poss tauntüna na giavüscher ün bun stomi per digerir tuot que!

Gnir vegl po vairamaing esser üna crusch! Che esa da dir? Uossa seja che cha vess pudieu scriver sülla cartulina d'anniversari: Chera Lisina, gioda la tuorta d'anniversari, eir scha hest zücher. Baiva e gioda tieu vin mincha di, eir scha pigliast tuot quists medicamaints. Eau at giavüsch da cour, cha detta auncha bgeras emissiuns dals cuschinunzs chi cuschinan i'l studio e't faun gnir l'ova in buocha scha'ls guardast. Lisina, lascha sainza guarder las noviteds chi't deprimeschan. Nu penser a damaun, la vita es hoz ed hoz dess esser ün bun di! Tuot il bun Lisina, tia

 

Lisa Lisetta

08/2012

L'olimpiada es a fin                  

 

Che lodavaglias per tuot las gazettas intuorn. La plü bella olimpiada culs plü bels spettaculs al cumanzamaint ed a la fin e cha perfin las "Spicegirls" s'han missas insembel amo per quella saira es bain stat tantüna üna roba grondiusa. I scrivan perfin cha'l muond haja pudü celebrar la plü paschaivla olimpiada a Londra e quai intant cha'l muond guarda pro al medem mumaint sco chi vegnan mazzacrats tschients da persunas in Syria. Quia ha la medaglia propi duos varts. O che n'haja let chi füss da crear üna nouva disciplina pels Africans chi vess nom "svanir" per chi vessan eir darcheu üna schanza da gudagnar medaglias. Set sportivs dal Kamerun han nüzià la pussibiltà da paquettar lur tas-chas avant cha l'olimpiada d'eira a fin per na stuvair tuornar in lur pajais e per pudair restar in Europa. Eu n'ha grond'incletta per ün tal agir ed a quels chi rian e fan schnöss da quai füssa da giavüschar ün on Kamerun o Eritrea.

I lura perche tuot quistas disciplinas sco per exaimpel büttar il martè. Che sen fa quai? Perche as bütta davent il martè? Forsa our da rabgia pervia chi's ha dat üna giò per ün daint? O per ex. Mountainbike o Beachvolleyball sco schi dess muntognas o rivas a Londra. A Londra vessa stuvü dar disciplinas sco: Chi sa rivir il plü svelt il parisol o chi riva il plü svelt tras il trafic da la saira o simplamaing robas chi's dovra minchadi. Eu nun ha amo mai vis cha duas persunas noudan sincron illa vita normala… O i's vess pudü dar medaglias als politikers ed als managers onests. Lura dessa forsa in avegnir daplü da quels, schi survgnissan bellas medaglias. Eu dess eir medaglias a tuot quels chi's sfadian pella protecziun da l 'ambiaint ed a quels chi s'ingaschan per quels plü povrets chi nu sun buns da's defender svessa

Sun fingià be buonder schi vegnan scumpartidas eir amo dal 2022 medaglias e forsa lura eir per quel o quella chi spala il plü svelt davent la naiv per far liber las vias pella signuria.

 

Giovannina T. Tschlin

 

 

 

 

 

 

06/2012

La revoluziun dals grischs                    

 

„Aja, hest vis?“

„Che?“

„Ma da quistas revoluziuns dapertuot.“

„Hei, a vain revoluziuno da tuot las varts.“

„Ma hest bado?“

„Che?“

„Il tipic revoluziunari es bain giuven, masculin, forsa cun barba, cun chavlüra lungia chi cumbatta per nouvas idejas.“

„Hei, e lura?“

„Ma che, tar nus es que darcho üna vouta tuot oter.“

„Cu mangiast?“

„Ma guarda nos revoluziunaris, quels haun tuots chavels grischs e cumbattan per idejas da sterzas, per cha tuot resta scu cha que nun es mê sto.“

„Tü managiast a nu sun revoluziunaris ma pütöst retro-voluziunaris?“

„Precisischem!

„Aba, eau nu’m fatsch üngüns pissers. Sest, l’avegnir vain in mincha cas, eir sch’as fo tuot per impedir quel.“

 

Chatrina Josty

05/2012

Creschentscha                   

 

Avant ün pêr dis n'haja tgnü in bratsch ün popin, üna mattina d'ün mais. Quant pitschnins sun seis manins, quant pittin seis nasin! Ed i funziuna tuot – che miracul! Seis corp, seis mans e nas creschan mincha di be pakin, millimeters. In desch ons la pitschna sarà già üna bocra mattatscha ed in trent'ons üna duonna attractiva, forsa svessa mamma. Ed in ottant'ons ....

Sch'eu guard hoz our da la fanestra am para be da verer a crescher las fluors e l'erba frais-cha da la prümavaira. Il terrain es bel ümid, chod il sulai, las megldras premissas d'üna creschentscha früttaivla. La vegetaziun chi flurischa adüna darcheu, mincha prümavaira – che miracul! Lura sflurischa, schmarschischa, as dischfa ella e dvainta terra. Quai es il gir da la natüra, il gir etern – crescher e passar e crescher ...

L'economia sto crescher (as dumanda be in chenüna direcziun)! L'economia p. ex. da la China e da l'India creschan actualmaing per daplü da 10%. Üna gronda creschentscha es eir la mera da mincha impraisa. Sch'ün concern sto publichar creschentscha nolla as vezza subit la fin dal muond, perdita da bleras plazzas da lavur, crash da las buorsas. Ma, es üna pitschna o ingüna creschentscha vairamaing uschè mal? Nu pudess quai significhar eir stabilità e sandà?

Daplü vias han per consequenza daplü traffic, daplü abitaziuns da segunda proprietà daplü fits impajabels, daplü armas daplü guerras, daplü consüm daplü bsögn d'energia e daplü plündriada da resursas e.u.i. Chi craja vairamaing vi d'üna creschentscha infinita, vi da resursas illimitadas? Dal 1972 es cumparü il cudesch «The limits to Growth – Bericht zur Lage der Menschheit» (ils cunfins da la creschentscha). D'Alexi Nay e Marcus Hobi daja la chanzun «Vinavon anavon» in quella tematiseschan els il "adüna daplü ed il adüna plü svelt". Il cudesch e la chanzun am plaschan bain, i sun fich actuals.

Cumprain e legiain cudeschs, tadlain musica e chantain svess! Ans occupain dal svilup da la cultura. Admirain ils progress dal popin ed ans allegrain da la bellezza da las fluors!

 

Regula Bücheler, Brail

04/2012

Ün muond infernel                  

 

"Ah...mamma...", uschè reagiva la glieud pel solit cur ch'eau quintaiva ch'eau saja mamma a temp cumplain. Ün "ah...mamma..." cumpaschiunaivel ed incredul. Niauncha stizi d'ün "ah, mamma!" combel d'admiraziun e bainvuglientscha. Mieus iffaunts sun intaunt pü grands ed independents ed eau lavur cò e lo darcho scu schurnalista. "Ah, schurnalista!", tuna que uossa. Ho, ho! Quelo schi es ün mister in uorden! Niauncha stizi d'ün spredschabel "ah...schurnalista...". Na, na! Schurnalista! Uei. Scu schurnalista a stu savair qualchosa. As stu savair scriver. E leger. E fer dumandas. E druver ün computer. Que es greiv. Sainza stincals! Que es propi greiv. Impustüt zieva cha's ho fat quattordesch ans a la lungia be la mamma. Cha nu's ho dimena, per uschedir, fat ünguotta. Parturir, lattanter, chürer, fascher, cufforter, cuschiner, declarer, laver, giuver, organiser, brancler, musser, zarcler, quinter, zambrager. Vo bain, il term "fat ünguotta" es forsa ün pô exagero. Fer as fo eir scu mamma qualchosa. Ma displaschaivelmaing ünguotta da scort. A ster tuotta di traunter pezs plains, sbavarins e sbarbugliöz infantil as perda la tramuntana, nevaira? Que's tössi pel tscharvè. Ün unic perdatemp. Ma schi, cha'l dianzer! Che diavel d'heja be penso quel di cha d'he decis da renunzcher a mia grandiusa carriera per pudair accumpagner, edücher e perchürer mieus iffaunts? Ün muond sainza mammas a temp plain füss sainza dubi ün meglder muond. Ün muond pü efficazi. Pü professiunel. Individuel. Intellectuel. Ün muond infernel...

 

Bettina Secchi-Fluor

 

 

 

 

 

 

03/2012

La cuolpa sun ils Muslims               

 

Engiadinais sun refurmos, Sursilvans sun catolics. Engiadinais sun cunter rumantsch grischun, Sursilvans sun per rg. Ma ils Jauers sun catolics e sun per ed al listess mumaint cunter il rg. Quels pioniers sun galoppos in ün futur cha svess nu saun pü che via ir! Uossa as vezza be che dischuordan cha'l rg ans ho procuro, a nu s'inclegia pü ünguotta! Es propi il rg la cuolpa da tuot?

In Engiadina es minchün ün refurmatur. Minchün predgia als oters che cha vessan da fer. Minchün es ün rebel e tendenzielmaing dafatta ün terrorist. In Surselva sun tuots catolics devots, fidels, obediaints e seguan a las autoriteds. A sun eir adüna seguieus a que cha'ls presidents vaivan dit, a que cha'l chef-redactur vaiva scrit e dit, a que cha scienzios e tuot quels da cusü vaivan predgio. Ma uossa pera cha tuots as rebellan, la revoluziun africauna es ruott'our in Surselva. Ad haun piglio il puogn our'd giglioffa. Finelmaing s'oppuonane, s'organiseschan e reclaman. A sun cunter las directivas da l'ovas-ch, a cuntradian a la Lia, a nu taidlan pü al chef-redactur, als politikers ed als linguists. In Surselva do que votaziuns cunter rg in scoula. Ma tuot quist caos nun es la cuolpa dal rumantsch grischun e neir na dals Engiadinais. Tuot es insceno ed organiso da forzas estras. In Surselva cumandan hoz ils Talibans. Il spiert rebel es emigro da l'Engiadina in Surselva. Ils Muslims vöglian desdrüer nossas structuras politicas e socielas, noss uorden e dret. Els cumbattan nossa cretta, nossas baselgias; la catolica taunt scu la refurmeda. La cuolpa da tuot il dischuordan actuel sun sgür ils Muslims.

 

Annemieke B.

02/2012

Sun las duonnas be plü üna rüzcha?        

 

Minchatant as chatta in gazetta da tuotta sorts inserats. Uschè n'haja let ultimamaing ils seguaints inserats:

  1. Duonnas fich charas da l'Ucraina vessan gust dad avair üna relaziun cun homens svizzers chi han interess vi d'üna marida. Ün pêr chi sta a Kiew fess ils arrandschamaints pels inscunters e füss eir pront da tils imbellir al lö d'inscunter per üna paja fich onesta. Cun leger amo daplü sur da quist pêr da Kiew am sun gnüts adimmaint pleds sco organisaziuns da cuntrabandiers da persunas e commerzi cun duonnas.

  2. Duonnas da l'Ucraina e da la Slovakia sun cumpognas idealas per üna prüma mo eir per üna seguonda lai. Ellas sun fidelas, familiaras, bellas, scoladas, scharmantas, be temperamaint, capablas da s'adattar ed i san plüssas linguas. Ellas nu fan eir na bler cas scha'ls homens sun plü vegls e schi han fingià uffants . Daspö generaziuns sun quai las duonnas predilettas da blers homens dal vest. Ün inscunter cun quellas es pussibel be subit, eir inclur in Svizra, sainza ris-ch e be per pacs raps. Schi nu vegn dat ingün' incumbenza as survegna inavo ils raps e quai amo cun fits.

 

Quist inserat es amo plü sdegnuoss. Duonnas da pajais inters vegnan missas aint il medem chaschuot. Perche vegn üna duonna chi'd es bella, fidela, familiara e.u.i. idealisada sco la megldra duonna chi dà? Cun tuot quists adjectivs vegna be sugeri cha quistas duonnas nun hajan ingünas pretaisas invers sai stess e chi sajan prontas da servir ad oters. Cha quai plascha propi a tuot ils homens nu possa neir na crajer dal tuot.

Che capita scha la duonna scolada da l'Ucraina cumainza a pensar svessa e scha la bellezza our da la Slovakia bada ch'ella nu po avair ingüns agens giavüschs e cha be quels da seis parternari svizzer quintan? Che institut da profit es quai chi propaghescha la seguonda lai e garantischa eir amo raps cun fit da fit scha la duonna nu vess da plaschair? Che affar suos-ch! Per mai es ün partenadi cun medems drets per tuots duos partenaris, cun o sainza attest da matrimoni, il plü evidaint da la vita.

 

Giovannina T

il Chardun

revista  rumantscha independenta

CH - 7559 Tschlin

fon 081 866 36 76

IBAN CH