il Chardun

revista  rumantscha independenta

CH - 7559 Tschlin

fon 081 866 36 76

IBAN CH

11/2012

Arriv in Engiadina              

 

Ün viandaunt chi giaiva per munts e cuolms arrivet in ün god inua cha bgeras tailas d'aragnun as tachaivan vi da sia vista e sias uraglias. Fügind da quist god molest ho'l chatto ün signun chi al ho dit ch'el saja arrivo in Engiadina e cha uschè sajan ils gods in Engiadina. Tscherta glieud hegia dresso aragnuns chi attachan vzüda ed udida; cur cha la victima es imbarazzeda avuonda, schi ils aragnuns tscherchan sia buorsa e tessan intuorn quella lur tailas chi tachan. Zieva detta que diversas metodas per trer la buorsa our da giglioffa per la svöder.

Nos viandaunt ho miss sia buorsa in giglioffa bain serreda. El ho chatto la via vers il prossem cumün. Lo es el ieu in ustaria per manger qualchosa ed ho dumando ün magöl ova da chüern. In survgnind sieu quint nun è'l sto poch surprais cha sia rösti custaiva ses francs ma il magöl ova quatter francs. L'uster al ho dit cha ils turists esters pejan adüna quel predsch per l'ova da chüern, ma cha ils indigens postan pü gugent ün magöl vuclina chi cuosta be 3.80; il restorant hegia eir da pajer sia imposta per l'ova e cha dal rest, scha's vezza ils guadagns dals impressaris chi vendan u daun a fit chesas, schi cha'l pitschen guadagn sün l'ova da chüern saja be üna bagatella.

Ün hom a la maisa daspera al ho dit cha sch'el saja in cas da cumprer quist hotelin schi pudess el fer infra duos ans ün affer enorm: el stuvess be cumpruver a la fin da l'an cha l'hotel fatscha perdita contabla, alura pudess el müder tuot quist spazi in abitaziuns da vacanzas. La fabrica da similas abitaziuns siand scumandeda schi l'affer garantiss ün guadagn immens. Il viandaunt impissaiva cha per indigens reuschissan bain da quists affers, ma che cun ün da la Bassa? Ma els l'haun dit cha que basta sch'el dvainta member d`ün dals partieus chi s`intermettan per la garanzia constituziunela da la proprieted: cun que dvantess tuot pussibel.

Giand zieva intuorn il cumün, tres vias bod desertas, ho nos cumper inscuntro üna fuolla a l'ur dal lö chi guardaiva ün pêr giuvens chi giuvaivan a ballapè. Per ün matsch as schmuaintan bger dapüs cu per las radunanzas cumünelas u las votumaziuns. Ils cuvihs subvenziuneschan quistas partidas per divertir ils abitants, chi sun alura bod tuots pronts da reeler las suprastanzas cumünelas e d'appruver lur propostas. Ün po pü tard d'he vis ün hom chi muntaiva a grands pas vers l'Alvra; cul spievel d'heja constato cha quel nun eira oter cu nos viandaunt, ad el ün di in Engiadina ho bastieu per tuot sia vita.

 

Claudio Caratsch

 

 

 

 

 

 

09/2012

Olimpia: Chi dess ster a chesa ?             

 

Uossa vegna serius culs gös olimpics a San Murezzan / Tavo. Daspö cha l'ideja es lantscheda, udins da gös pitschens. Però: auncha nun ho üngün dit chi chi dess ster a chesa. Fin uossa sun ils gös olimpics be gnieus pü grands. Per Sotschi ho il IOC darcho decis diversas disciplinas impü. Ed il listess IOC vess da decider gös pitschens ?

A vo vers la votaziun. Uossa esa ura da dir concret cu cha'ls gös dessan gnir pü pitschens. "Gös olimpics persistents e cun plain resguard sül ambiaint" es la devisa, oter niauncha nu saja que hoz pussibel, dian ils promotuors. Ün exaimpel concret: La festa d'avertüra e la festa finela sun previssas tenor il concept preschanto da la Regenza l'eivna passeda sül Lej da San Murezzan dschiet, aint il golf suot la Meierei, in üna cuntredgia chi sto suot tripla protecziun (Inventari federel da las cuntredgias d'importanza naziunela BLN / Ordinaziun davart la protecziun da la regiun dals lejs da l'Engiandin'Ota / contrats da la Pro Lej da Segl cul cumün da San Murezzan). Cò es previs ün palc per 35'000 aspectaturas ed aspectatuors sün palafittas temporeras. Dimena: Vias da fabrica e transport per tuot l'infrastructura e'ls giasts / picher aint ils pêls aint il lej e darcho ils strer our / disturbis illa zona da la riva e dal god. E tuot per duos evenimaints chi nu düraron insembel dapü cu quatter uras. (Scu conguel: Las ceremonias tal champiunedi mundiel a San Murezzan haun düro var trais quarts d'ura perque cha'd es memma fraid). Nu sun cò las bellas declaraziuns per ambiaint e natüra pleds vöds ?

Jürg Stettler da l'Institut turistic da la Scoula ota per economia da Lucerna ho congualo ils büdschets e las prognosas economicas al mumaint da la candidatura culs effets effectivs eruieus tschinch ans zieva ils gös. Per Lillehammer, chi vain adüna darcho numno scu bun exaimpel per gös olimpics, sun documentos seguaints effets: Traunter las teorias aunz ils gös e'ls effets reels zieva ils gös sun las differenzas grandas. Las investiziuns effectivas sun stedas tschinch voutas pü grandas cu quellas prognostichedas. Il svilup economic effectiv es resto traunter 55% ed 85% suot las prognosas. Ils effets s'haun concentros sün Lillehammer, las periferias s'haun sviluppedas suot la media. Il maun public ho zieva ils gös gieu da spargner ed ho diminuieu las expensas per 12 – 15 %. Ils gös haun genero be 300 nouvas plazzas cun cuosts pel maun public da ca. 3 milliuns dollars pro plazza. Ils promotuors da San Murezzan / Tavo prognosticheschan "fin a 15'100 plazzas interas e parzielas aunz, düraunt e zieva ils gös". - Cha gös olimpics nu possan esser persistents (v.d. economics / ecologics / sociels) conferma eir l'anteriur professer da turistica Hansruedi Müller.

Hanspeter Danuser disch cha ils gös previs füssan ün enorm incharg e fessan pü dan cu nüz a la regiun. Per la part da San Murezzan prevezza il concept üna dimensiun var quatter voutas pü granda cu il champiunedi mundiel dal 2003. Da vulair metter quist proget immens aint ils duos - tenor imsüras olimpicas – pitschens cumüns da San Murezzan e Tavo es our da mincha relaziun.

Il CHARDUN disch: Ad es ura da gnir concret cun gös olimpics pitschens, uschigliö pudess Olimpia dvanter ün proget spinus.

 

Jost Falett

08/2012

A chi tocca il Parc Naziunal?                      

 

Blers chi fan spassegiadas o gitas van da quist temp aint il Parc Naziunal. Quel es gnü fuondà avant 98 ons da persunas chi vaivan ün orizont vast e savaivan guardar vers l'avegnir. Precis sco per exaimpel la protecziun dal Greifensee aint il chantun da Turich, ün lai immez l'agglomeraziun urbana cun las rivas intactas e na surfabrichadas. Quai cha'l meidi Emil Stadler dad Uster vaiva inizià per seis contuorns ha fat Steivan Brunies cun la cuntrada epica dal Parc Naziunal. Grazcha a quels pioniers, hozindi nu füss quai probabel plü pussibel!

Ma da chi es vairamaing il Parc? Cun quai cha'l tocca a la Confederaziun è`l da nus tuots, s'inclegia. Seis territori as rechatta però aint il intschess rumantsch. Da prüma davent han ils respunsabels tgnü quint da quai e til han nomnà Parc Naziunal Svizzer, sco chi's po leger a las duos entradas sün la via dal Pass dal Fuorn. In Svizra respettaina las linguas, perquai ha eir la Biosfera Val Müstair tschüf ün nom rumantsch, ed eir il candidat Parc Ela vain scrit cun C e na cun K!

In oters pajais nun es quai uschè. Chi chi visitescha ils parcs aint ils Stadis Units bada bainbod, cha'ls noms originals cha'ls indigens vaivan dat sun gnüts rimplazzats. Il Bryce Canyon, üna da las valladas las plü impreschiunantas, ha tschüf seis nom dal paur irlandais Ebenezer Bryce chi vaiva sia pauraria in vicinanza. Per la populaziun dals Paiute, co chi han nom ils Americans da naschentscha (Natives Americans) da quella regiun, es quai la vallada da las Angka-ku-wass-a-wits. In nossa lingua significhescha quai "fatschas pittüradas cun cotschen" ed as referischa a las fuormaziuns da crap cotschen chi dan a quel canyon sia taimpra speciala. Quist es be ün exaimpel tanter blerischems noms rimplazzats da las "fatschas sblachas", co cha'ls "Indians" clomaivan als immigrants da l'Europa.

Natüralmaing cha blers dscharan: Ma nus gnanca nu pudessan pronunzchar quel nom indigen uschè cumplichà. Quai es vaira be per part. Nus das-chain bain pretender cha'ls turists dal Parc Naziunal imprendan a pronunzchar ils noms rumantschs. Precis sco cha üna part da New York ha mantgnü il nom da Manna-Hatta chi voul dir "insla cun cullinas". O lura as pudessa almain tradüer in inglais Red-painted faces Canyon e respettar in quista maniera la ierta culturala.

Ma attenziun: respet nu cumporta l'uschedit Etikettenschwindel! In duos eivnas organisescha l'Academia Raetica ün congress scientific a Tavo. Üna da las secziuns vain presidiada dal directur dal Parc ed aint il program as poja leger "Chair: Haller Ruedi - Parc Naziunal Svizzer". Cun satisfacziun legiaina il nom ufficial da nos Parc tanter il Global Risk Forum o la European Academy of Bozen ed il Institute for Snow and Avalanche Research SLF. Ma in duos ons festagescha il Parc seis giubileum da 100 ons. E lura pür pudarana constatar scha l'identificaziun tanter il Parc e l'ambiaint rumantsch vegna propcha realisada e respettada...

 

Pradèr da Pradasütta

07/2012

Che daja da leger in ladin?               

 

I nu's sa inandret in che direcziun cha'l vent boffa cun la custabaria ladina. As es landervia ad archivar il 20avel tschientiner; minchatant para que cha la s-chaffa da cudeschs vegna missa in ün büschmaint d'indumengias, cha Peider Lansel, Andri Peer, Jon Demarmels, Jon Pult e tants oters ston gnir rinfrais-chats per far parada. I's po eir argumentar cha que saja bainfat da far reviver ils « gronds » dal tschientiner passà perchè ch'els han amo hoz qualchosa da dir. Be quel chi cugnuoscha il passà po affruntar l'avegnir. Noschas lenguas dischan eir cha uschè as possa zoppantar la mancanza da vuschs actualas chi sun raras tar nus e chi's po dombrar sün traja dainta. I tillas dà, schilafè; per nu sparmalar ad ingün nu fetsch eu noms. Ün oter fat interessant es eir cha prodots litterars cumparan vi e plü in ediziuns bilinguas, ün segn cha autuors/auturas as saintan dachasa in duos chasas dal pled scrit e chi nu vulessan cha lur vusch resta restretta sün trais o quatter lectuors/uras rumantschs/as chi per part ston leger ils texts per rasar our ils differents premis d'incuraschamaint, da recugnuschentscha etc etc.

Laina ans lamentar cha uschè pacs granins croudan sün terra früttaivla e cha l'interess as distacha adüna dapü dal scriver e dal leger? Eir quia daja cuffort; cha quist saja ün trend global, e perchè vesssan nus Ladins dad esser ün'excepziun? I's po però eir tour ün'otra perspectiva: I nun ha forsa mai dat uschè bleras persunas giuvnas chi scrivan texts, pensain a la PUNT barmöra, pensain als songwriters da la scena musicala. I dà segns da vita e quels sun vitals ed originals.

 

Romedi Arquint

 

P.S. I dess eir amo perlas da scuvrir. Eu n'ha quia ün exaimpel ed As dumond : Chi as zoppa davo quista poesia, tant autentica sco profuonda:

Dumonda

Di'm quant lönch / Douvra meis cour / per chapir / cha mia via nu douvra / ne böt ne temp ne avegnir // Eu chant e nu vögl tunar / Eu tscherch ed invlüd da chattar // Be perdond possa retschaiver / be sco eremit possa dar // Viver per perder / murir per chattar.

Ans scrivai il nom da l'autur/a ; nus train la büs-cha e regalain ün cudesch!

06/2012

La radunanza cumünela                  

 

La sela cumünela da S. es stachida plaina cur cha'l president da cumün evra la radunanza. Que vo per ün müdamaint da zona per üna surfabricaziun cun üna villa-hotel-ressort. L'iniziant, l'advocat F. as metta davaunt il public e spiega sieu proget in möd fich eloquent cun imegnas dal "powerpoint". In seguit vegn do il pled a duonna C. da l'opposiziun. Ella vo davaunt vi e - nu rabaglia our ün pled. Ella ho pers la vusch. Chi ria, chi dvainta gniervus ed il president nu so guera che fer. Zieva ün mumaint penibel as oza l'iniziant e propuona da ler el il manuscrit cha la duonna tegna in maun. Tuot es stut e perfin la duonna tuot perplexa al spordscha il text, ün referat inter ed intrat.

F. cumainza a ler cun vusch sonora. Ils pleds sun tschernieus perfettamaing per l'occasiun, ils argumaints sun clers e bain ponderos. Sar F. ho da conceder in sieu intern, cha que ch'el legia ho mauns e peis. Dapü ch'el aintra illa materia, dapü tuna sia vusch plain schlauntsch e persvasiun. A la fin dal referat declama el bod euforic:" E perque cheras votantas e votants – NA a la surfabricaziun!"

Grand applaus our dal ravuogl da la radunanza. F. es tuot confus, el nu so scha l'applaus es per el u pel text – chi demuossa il cuntrari da que ch'el voul.

Il president evra la discussiun cun nosch presentimaint. Qualchün cumainza a dir, cha que cha F. hegia dit l'ultim saja pü persvadant cu que ch'el hegia dit al cumanzamaint da la radunanza. Ün vegliuord suord, chi ho adüna il bsögn urgiaint da dir la sia in lung e larg, dumanda uossa perche cha F. saja cunter la surfabricaziun, siand cha l'iniziant eira rivo tar el in chesa per il persvader da vuscher "schi" al müdamaint da zonas. F. prouva da spiegher, cha que ch'el hegia let nu saja sieu managiamaint – ma i'l battibuogl generel üngün nu'l craja ed üna duonna ün po furiusa l'imbütta dad esser ün schlabaccar chi nu so che ch'el vöglia. Intaunt prouva duonna C. cun mauns e peis da declarer qualchosa e cotres as saintan eir oters animos da druver ils mauns e tuot sbregia ün traunter l'oter. Il president prouva da metter uorden, ma uossa plouva que imbüttamaints dad aderents ed adversaris, ch'el hegia scu president fat da memma u memma poch, insomma ch'el dess demischiuner. Il president avilieu proclama la fin da la radunanza, chi vain suspaisa. F. voul salver il salvabel e revelescha cha'l proget vegna finanzio d'ün Grec milliardari, fügieu cun sieus raps our da la Grecia per piglier domicil a S., ma la glieud es già svanida riand e blastamand our da la sela.

 

Anna Ratti

05/2012

Democrazia ?                 

 

In temps vegls pudaivan ils vschins da la drettüra d'Engiadin'Ota tscherner minch'an lur landamma, a cundiziun cha que saja, almain mincha seguond an, ün member da la schlatta Planta. Suvenz gnivan pajedas las vuschs, pustüt cur cha's trattaiva da las chargias in Vuclina. Uschè il candidat il pü rich avaiva las meldras vistas. Dal 1687, ils Planta haun impromiss a Jachiam Albertini da la Punt Chamues-ch 3000 rentschs per lascher la plazzza da Commissari a Sondrio a Peter Planta da Zuoz. Tuottüna valaiva dal 1576 per il scriptur zürigais Josias Simler il Grischun scu il stedi il pü democratic, auncha pü cu la Confederaziun svizra.

Avains nus fat progress daspö quel temp ? Las constituziuns federelas successivas haun do drets pü extais als vschins, ma ils vschins peran da's dischinteresser viepü da lur drets politics . Scu iffaunts chi nun as interessan fich lönch per ün giovaret nouv, nos vschins peran da chatter lungurus da stuvair parteciper a radunanzas cumünelas, a tschernas politicas ed otras fatschendas federelas, chantunelas ed impustüt cumünelas.

Üna perscrutaziun fatta da poch inno muossa cha radunanzas cumünelas in Engiadin'Ota haun be interesso, in media dals ultims ses ans, seguond il cumüns, traunter 4,6% e 15,8 % dals abitants cun dret da vuscher. Eir lo inua cha's ho do als esters il dret da vuscher in affers cumünels ho que be tanschieu per 10,7 %. In quel bel cumünet tuottafat rumauntsch cha Reto Caratsch avaiva numno Marvenna as ho la pü granda difficulted da chatter candidats per il cussagl cumünel, tauntpü cha mincha mais ün u l'oter dals depütos demischiunescha dal cussagl. Ad es gnieu invento ün möd da tschernas chi permetta als candidats unics da gnir tschernieus cun üna unica vusch. Scha'd es be ün candidat, las vuschs per oters nu velan. Ün per nostalgics dals temps democratics nu paun fer oter cu da der gio üna cedla vöda. Ad üna tscherna avaunt poch cun ün candidat unic eiran 30% da las cedlas vödas. Ün president cumünel am disch cha la glieud nu vöglia as fixer ad üna opinion dürabla; ün po dapü persunas partecipeschan a tschernas chantunelas u federelas secretas a l'urna: per l'intera Engiadin'Ota 45,1 a las ultimas tschernas dal Cussagl naziunel e dafatta 55,1% a l'initiativa Weber. Nu pleda quista situaziun per üna democrazia indirecta in ün grand cumün fusiuno per tuot l'Engiadin'Ota ?

 

Claudio Caratsch

04/2012

Vent da vender, aua da vender,

sulom da vender             

 

Dapi in pèr decennis existan en nossa tiara leschas da planisaziun ch’ein vegnidas approbabas dalla populaziun. Cunquei ch’il diember da carstgauns che vivan cheu ei carschius duront quei temps dramaticamein eis ei semussau con necessari ed impurtont ch’ei fuss da decider ligiontamein tgei parts dalla cuntrada sappien vegnir duvradas per habitar, tgei zonas ch’ins vegli reservar all’agricultura, all’industria, e tgei spazis ch’ins vegli prever per auters intents. Negin che metta en dubi con impurtont ch’igl ei dad era definir ils spazis libers e da schizun proteger explicitamein ina part da quels. Gest ina tiara ch’ei populada schi spessamein sco la Svizra ei avisada da disponer da zonas nua ch’il carstgaun sa era semuentar libramein, s’entupar cun la natira intacta, experimentar tgei che quei ei: viver e sentir il flad dalla veta. Naturalmein, quei spazi ei buca cheu en emprema lingia per il carstgaun, mo senza la rihezia e diversitad, che sa sesviluppar mo en in spazi nua ch’il carstgaun farvaghescha buca permanentamein entuorn, daventa era sia veta paupra.

Ei para che gest el mument seigi la populaziun dalla tiara – sch’ins teidla tgei che nos portavuschs economics regiunals e cantunals perdegheschan – vidlunder da patertgar suenter tgei tut ch’ins savessi aunc vender dabot. Ei dat cuntradas e valladas el Grischun ch’ein sil precint da dar ora tut las cartas dil giug en ina gada. Sin collinas e fils parcs da vent per producir energia electrica. Las auas restontas dueigien vegnir deviadas per ingrondir las ovras electricas existentas e carschentar las entradas. Ils indrezs d’enevaziun dueigien vegnir ingrondi e generalisai per segirar il sport d’unviern. Las zonas da casas cun habitaziuns secundaras dueigien vegnir explotadas tochen il pli davos mument pusseivel, e tscheu e leu ei aunc enqual hotel previus. Hosps duvrassen nus era la stad.

Curiosamein figureschan las valladas sursilvanas el plan directiv cantunal sco regiuns turisticas. Lein buca discuorer surlunder sche quella categoriaziun generalisada seigi empau temeraria ni buc. Mo in pèr da quels projects numai el tetel da quella glossa – tut projects existents! – stattan diametralmein en opposziun cun la finamira d’etablir las regiuns periferas sco destinaziuns turisticas.

Zanua sto la vendita generala vegnir limitada sch’ins vul buca riscar da metter a frusta l’entira basa economica e vitala. Mo quei drova discussiuns differenziadas e buca polemica. E cunzun san ins buca surschar quella discussiun a quels che secuntentan cun in profit a cuorta vesta. Ei po esser en lur interess. Mo ei quei era igl interess dalla regiun sezza?

 

Cristian Collenberg

03/2012

Uossa basta !                  

 

"Uossa basta !" ho dit Franz Weber e lantscho l'iniziativa. "Nus vains avuonda lets illas Alps". Ed eir il pövel ho dit: "Uossa basta !"

"Uossa basta !" haun dit già la dumengia da la votaziun eir noss politikers: "Ils muntagnards suot avuadia da la Bassa" / "Ün di s-chür pel federalissem" / "Chantuns da muntagna bainbod be pü reservats ?" / "Dictat ester per las regiuns alpinas" / ... Noss politikers ? In Engiadin'Ota haun dit da schi a l'iniziativa sur 44% e las vschinaunchas da Samedan, La Punt e Bever – e Segl es sto pari. Per las presidentas e'ls presidents cumünels üngün motiv per tadler e resguarder eir quellas vuschs. Inclegiantaivel, scha sun già stos da l'avis cha l'iniziativa da la Glista Libra da 50% per l'intera regiun nu saja valaivla – cha la quota da seguondas abitaziuns saja chosa da las vschinaunchas. Sun ils 20% decis dal pövel eir chosa da las vschinaunchas – giarone eir cun quella decisiun avaunt güdisch federel ?

La Confederaziun e'l chantun installeschan gruppas da lavur per realiser ils böts da l'iniziativa. Ils capos da l'Engiadin'Ota vöglian attribuir cun lur granda experienza areguard seguondas abitaziuns. Ed a chi vögliane deleger ? Precis a la presidenta da quella vschinauncha chi ho già 77% e lascha auncha adüna fabricher 80% seguondas abitaziuns nouvas. "Uossa basta !" ho dit la Glista Libra. Cu dessan güsta quellas e quels politikers chi haun cumbattieu l'iniziativa chatter la dretta via per realiser quella – sainza resguarder ils aderents chi cumbattan daspö ans e decennis per main seguondas abitaziuns ?

Nu basta pü la lavur per l'industria da fabrica ? Ün exaimpel: Zermatt ho introdüt dal 2007 cun 850 m2 seguondas abitaziuns l'an la restricziun la pü severa da la Svizra (in conguel: Bever ho ün contingent da 500 m2 l'an). Üna catastrofa per l'industria da fabrica es gnida profetiseda. L'incuntrari es capito: Dal 2008 – 2011 ho investieu la hotellaria da Zermatt sur 200 milliuns, tscherts progets haun stuvieu gnir spustos, perque cha'd ho mancho la capacited da fabrica. - E tar nus ? L'industria da fabrica grischuna ho gieu dal 2011 ün an da record: 10,6% dapü schmerdsch cu l'an aunz, tar la fabrica dad abitaziuns ün augmaint da 7,1%.

E'l pü nouv: Parlamentaris grits propuonan zieva il "schi" dals 11 marz dad introdüer üna minorited da ses chantuns per blocker üna iniziativa. Cò disch eau: "Uossa basta !".

 

Jost Falett