11/2012
IL REFERENT
Cun tschoffan
el spüda
chadainas nteras
da pleds
malinclegiantaivels ad
uraglias
ignorantas
AVRIGL - MAI
Las ericas
bod sfluridas
terrain sdret
bröl mez sech
e patütsch s-chalmanà
rabüttan
in svampadas plainas
aromas dutschs
da nouva vita
DUMONDA
O profuondità
da l'orma
ingio cha ingün
ögl d'uman
nu po penetrar - - -
es là'l misteri
da la vita?
IL TEMP
Sco la lavina
sfrenada
chi's roudla furiusa
giò per las gravas
passa il temp
e's repeta
in algords
chi roudlan darcheu,
as movaintan
e sdarlossan
las doluors
fingià nattadas
Robert Luzzi:
es nat als 12 lügl 1927 a Lü ingio cha seis bap eira magister e paur.
Davo il seminar da magisters a Cuoira ha el dat scoula a Zezras, Thalkirch, Lü e Sta. Maria.
El es mort als 1. avuost 1997 a Lüsai.
Poesias: Il referent/Avrigl – Mai/Dumonda/Il temp
Our da: Larschöla, 1975, Flur da tschirescher, 1978Idiom: Vallader
TOP MEMORIA, vol. 1, Lirica rumantscha Miss a dispusiziun da Radiotelevisiun Svizra Rumantscha RTR
10/2012
ASCHERS D'UTUON
Cha l'utuon saja qua han ils aschers
vuglü surtour ils prüms dad annunzchar,
e mincha singul bös-ch, d'intanter blers,
tschercha d'esser sgiaglià plü co seis frar
Lur föglias cotschnas d'sang o d'rom
brünaint,
gelguas sco l'or in tuot sa variaziun,
al bös-ch fan viver ün glorius mumaint
e'l laschan lura nüd a l'abandun.
IL BANC DA SAR PLASCH
Sül banc avantporta sar Plasch es
tschantà,
el füma sa püpa cuntaint e bea;
da blers ans our d'Frantscha in patria
s'retret,
mo'l buonder da vegl cafetier al man-
tgnet.
Uschè, chi chi passa il sach sto svödar
(plü pac o plü bler sa minchün da
quintar);
quai va tuottadi sco ün vaira muglin,
danövs cha quel mola, da gröss e da fin
Sül tard, cur sar Plasch es a cuz aint in
chà,
han giuvens e giuvnas il banc reservà;
allegras bratschadas ün'vezz'a passar,
pro'l banc tuot chi‘s ferma, cun ir o
tuornar.
Ün ultim pêret es restà inavo,
cumbain s'han dit prunas, nu s'han dit
amo
lönch brich nö avuonda, ed uossa in
pasch
profitan d'la posa sül banc da sar Plasch
Nu passa plü orma, els sun be sulets
e's quintan suot vusch tuot lur milli
dalets,
mo quai ch'els eir scuttan in not e
s-chürdüm,
stat sgürs cha il banc nu disch our cun
ningün.
FIDELTA
Be scha'l poet rest'a sai svess fidel,
po l'emoziun sflurir in poesia
ed as transmetter cun la simpatia,
uond'invisibla, d'ün uman a tschel.
Ed amo sto vantüra cumpagnar
seis vers a lur destin, malsgür davaira.
ll cour ingio quels vegnan a's posar
nu das-ch'esser da marmel, ni da tschaira,
mo cour vivaint e ferm, cour chi pustüt
seis ideal sco poppa d'ögl perchüra
e poesia tegn'in salv sco früt
chi pür lönch davo clet plan sieu madüra.
Peider Lansel
es naschü als l5 d'avuost 1863 a Pisa. Scoulas a Sent, Cuoira e Frauenfeld.
Cun 16 ons in affars da famiglia illa Toscana; as retira dals affars dal 1906.
El as dedichescha a la cultura rumantscha sco poet, ramassader da chanzuns e cudeschs e sco defensur dal linguach rumantsch.
Poesias: Aschers d’utuon / Il banc da sar Plasch / Fideltà.
Our da: Ouvras da Peider Lansel, tom 1, Ediziun da l’Uniiun dals Grischs e da la Lia Rumantscha 1966.Idiom: Vallader
09/2012
Larschs
Larschs
mellans
flammas
d’or
inchauntan
mieu ögl
In quel
mumaint
croudan
aguoglias
Il spler
Eu invilg
quel
spler
chi’s
placha
sülla
palma choda
da tieu
maun
El at
charezza
cun elas
da vaider
Sunasencha
Chaunt
da sains
Sunasencha
Tuot tascha
Tuot dvainta
Quiet
Papavers
Papavers
da saida
iglümnan
l’üert
da mieus
sömmis
Papavers
flureschan
sur sted
Irma Klainguti
es naschida a Zuoz als 25 meg dal 1917.
Ella ho passanto trais ans üna scoula superiura a Turich ed ho frequento lecziuns a l’universited.
Zieva ün an da scoulaziun in ün ospidel d’iffaunts ho ella fat il seminari da mussedras e ho mno fin dal 1942 la scoulina da Samedan.
Ella es morta als 30 gün dal 2000 a Zuoz.
08/2012
Staila da la saira
Ögliada
vers
il
firmamaint
Nair
vöd
Culla
glüschainta
blocca
Glüscha
ad ün
glüschir
Pigliain
sia
glüschur
Venderdi sonch
Crucifichà
est gnü
tras
cuolpa nossa
Tia buntà
es infinita
e
muossa
la via pro Tai
ad
ün per ün
Maria Arquint-Bonorand
Es naschüda als 8 favrer 1932 ad Ardez.
Ella ha frequentà la scoula da commerzi e la scoula da chürunzas dad amalats a Turich.
Ella es statta maridada ed ha abità a Cuoira fin tar sia mort als 13 mai 1998.