il Chardun

revista  rumantscha independenta

CH - 7559 Tschlin

fon 081 866 36 76

IBAN CH

10/2013

La valur dals raps                

 

A St Louis ho gieu lö quist settember ün turnier da schah. Giuveders d'eiran ils duos meglders da l'America, Nakamura (2774) e Kamsky (2741) e'ls duos giuveders da schah dotos culla cifra la pü ota dad "elos" Carlsen (2862) ed Aronian (2802) .

Minchün ho gieu da giuver duos voutas cun minchün, üna vouta cun alv, dimena pudiand cumanzer la partida, ed üna vouta cun nair. In tuot ho minchün giuvo 6 partidas. Cur cha sun gnidas giuvedas las ultimas duos partidas staiva que 3 ½ Carlsen, 3 Nakamura, 2 ½ Aronian, 1 (voul dir ½ ed ½ ) Kamsky.

Nakamura e Kamsky haun giuvo cun grand ris-ch lur ultima partida, ma listess ho que do vaira svelt ün pari, in schah as disch que remis.

 

Nakamura vaiva uossa 3 ½ da 6 pussibels, Kamsky 1 ½, intaunt cha Carlsen ed Aronian d'eiran auncha vi dal giuver. Scha Aronian vess guadagno, vessan trais giuveders gieu il listess resultat (Carlsen, Aronian, Nakamura: 3 ½) ed a vessan gieu da giuver inavaunt tenor ün modus tuot speciel per decider chi chi vess guadagno il turnier e cun quel eir la summa da 70'000 dollars.

 

Hozindi vegnan turniers, importants pel gö da schah, mussos illa rait e que live. I'l cas da St. Louis vaivane ingascho a duos homens GM ed üna duonna GM (= Grand Master =grand maister) per fer lur commentaris tiers ils gös. E que es propi sto extraordinari da tadler lur commentaris! Normelmaing güdicheschan els la situaziun dal gö,

dian scha ün sto meglder in lur ögls e perche, alura dumanda ün dad els eir l'avis d'ün computer, e quels giouvan hozindi pü ferm a schah cu mincha umaun. Cur cha Aronian vaiva ün purin dapü, el staiva dimena materielmaing pü bain cu Carlsen, ho Aronian offert il remis. Uossa haun la commentedra e'ls commenteders musso emoziun! Tuots trais d'eiran sgürischems cha Carlsen acceptess dalum il remis, a la fin vaiva'l, cun fer quist ½ punct impü, avuonda per guadagner scu unic il turnier e cun que eir ils 70'000.- dollars.

Ma Carlsen staiva lo, vi da l'assa a stüdger e stüdger, e'ls commentaris gnivan adüna pü impazchaints: Che stüdgia quist martuffel, el sto main bain, ma sch'el accepta il remis guadagna'l ils 70 000 bugs u box, eau nu se cu cha's scriva lur pled ordinari per dir dollars. Quel dal computer ho alura dandettamaing güvlo cun stupefacziun: cha sia maschina muossa uossa üna minuzcha d'avantag per Carlsen. Nun es pussibel commentaivan la GM e'l GM sainza maschina e vulaivan inavaunt as der vi cha Carlsen nu pigliess ils dollars, dschess grazcha fich e partiss pü svelt pussibel darcho per l'Europa, anzi la duonna GM ho dafatta fat la remarcha umoristica cha Carlsen stüdgia prubabelmaing che fer culs 70 000 dollars per zieva accepter sainza dubi l'offerta da remis. Ma Carlsen, be pachific, stüdgiaiva inavaunt – tuot a cuost da sieu temp, s'inclegia – ed ho refüso l'offerta dad Aronian giuvand inavaunt. Uossa vessas gieu da tadler ils commentaris dals GMs! Cha ün umaun sün terra possa der dapü pais a qualchos'oter cu als dollars guadagnos e piglia sün se ün grand ris-ch da'ls perder darcho, d'eira qualchosa tuottafat nouv per noss buns GMs. In lur fö haune cumanzo a pruver dad incler a quist confusiunari d'ün Carlsen chi ho prioriteds uschè abstrusas, e poch a poch as haune dafatta laschos purter in ün'extasa d'üna spezcha d'admiraziun!

 

Carlsen ed Aronian haun alura auncha giuvo bod trenta trattas, fin cha Aronian d'eira telmaing illa schmüersa ch'el ho gieu da der sü. 4 ½ Carlsen, 3 ½ Nakamura, 2 ½ Aronian ed 1 ½ Kamsky.

Quist utuon giouvan Carlsen ed Anand, l'actuel champiun mundiel, pel titel da champiun mundiel. Forsa ho'l vulieu fer temma ad Anand? ho pruvo da s'explicher ün da noss GMs il cuntgnair straun da Carlsen.

 

göri

 

 

 

 

 

 

08/2013

Lod a la democrazia directa               

 

Eau d'he buns amihs in Germania chi haun bod invilgia da nus Svizzers, in mincha cas admirane fichun nossa democrazia directa. Eir els decidessan gugent sur da singulas chosas impè da pudair tscherner be persunas chi zieva decidan güsta que ch'ellas vöglian.

Eir in Italia e Spagna ed oters pajais europeauns es bgera glieud edücheda chi es persvasa cha in üna democrazia directa gnissan pigliedas decisiuns pü scortas grazcha al fat cha la respunsabilted nu vain adösseda a signulas persunas, persunas chi's laschan in generel gugent corrumper.

Eau incleg bain a noss chantunais intuorn ed intuorn nus. Ma qualchosa nu saun els: Nossa democrazia directa es d'uschè grand avantag be fintaunt cha els nu la mettan ad ir eir els! Pigliains il cas da la re-power e sieu proget d'ün'ouvra d'electricited cun cravun in Calabria!

Scha'ls Calabres cugnuschessan la democrazia directa scu cha nus la vains, füss il cas per nossa povra re-power e nos güsta taunt pover chantun Grischun - il grand acziunari da la re-power - già lönch pers. Güsta scu cha eir la populaziun grischuna dschess resolutamaing na ad ün'ouvra da cravun in Grischun vessan eir ils potentats da la Calabria, e lur amihs esters, da trer aint la cua scha'ls Calabres pudessan ir a vuscher in quista chosa.

Ma per furtüna vainsa be nus la democrazia directa! Uscheja paun noss capuriuns politics e nossa regenza cuntinuer a preparer l'ouvra da cravun da la re-power in Calabria. Be stüpid cha ün pêr extremists grischuns vaivan piglio l'iniziativa chi impediss quist'ouvra a l'ester e stüpid cha uossa la democrazia directa vain abüseda per eventuelmaing impussibilter quist'ouvra uschè attractiva per nos chantun - e per la re-power! Ma a pudains esser da buna spraunza: Nossa populaziun seguiro bain als capuriuns politics ed a la regenza: A la fin vo que per nos bainster, na per fanfanojas idealisticas, dutschinas da conscienzcha globela e se eau che…

Als 22 settember vuschains sur da l'iniziativa. Vulainsa propi seguir a las predgias da nossa ludaivla regenza e da noss capuriuns politics? U vulainsa profiter da nossa democrazia directa e dir cun forza: Schi a l'iniziativa?

 

göri

 

 

 

 

 

 

07/2013

Reliquias                 

 

Las religiuns mundielas haun tuottas fat cults cun tschertas reliquias, las ünas dapü, las otras forsa ün pô damain. Ils Buddists p. ex. crajan cha Budda saja gnieu cremo, e que pera cha differents raigs da l'India dal nord hegian alura piglio da quella tschendra e miss in salv, minchün in lur pajais. Cul ir dals ans es gnieu fabricho monumaints e taimpels adüna pü gradius in quels lös chi sun dvantos vi e pü senchs. Fich simil es que sto culs rests da Gesu Crist, eir cun sia crusch, cul pan da sieus vstieus, alura eir cun las restaunzas da tuot ils senchs da la baselgia cristiauna.

Quista mania da vulair avair qualchosa in maun, qualchosa in fuorma materiela chi stu deriver propi da la persuna adureda pera dad esser fich foppa i'l umaun. Eir hoz prosperescha la cretta illas reliquias, hoz pü cu mê, be cha que nu vain numno uscheja.

In giazetta as legia periodicamaing dad aucziuns dad ogets chi appartgnaivan a glieud cuntschainta, m'algord dad üna tas-china da la Monroe, dals ögliers da John Lennon, d'ün töchin restaunza dad üna da las guitarras cha Jimmy Hendrix vaiva ruot sül palc – tuot ogets chi haun ragiunt summas straminablas in quellas aucziuns.

Ma eir scha guardains il commerzi d'art dad hozindi vzainsa fenomens tuottafat simils scu'l cult cun reliquias: Daspö cha'ls investuors nu's fidan pü guera dad aczias perane da crajer dapü illa cretta da l'umaun in reliquias: Ouvras da van Gogh, da Picasso, dad Andy Warhole haun augmanto lur valur constantamaing. Be fich d'inrer, anzi mê nu capita que cha üna vain cumpreda per ün predsch pü bas cu la vouta aunz ch'ella ho müdo maun.

Que as pudess crajer cha quist cult cun ogets d'art fess augmanter la valur e'l prestisch eir da la glieud chi fo art, da las pitturas e pittuors, ma quelo sun be excepziuns. Per cha'l cult cun art vegna in svung stu que as tratter dad artistas u artists già ourdvart renumnedas, il meglder artistas chi haun vivieu ün tschientiner pü bod. Da quels dad hoz as fidan be ün pêr experts – e traunter quels do que ün pitschen pertschient amatuors d'art ed ün grand pertschient da spürs speculants.

Precis uscheja d'eira que eir già cul commerzi da reliquias düraunt il medievel: Per ch'üna reliquia valaiva qualchosa stuvaiva il sench esser mort già lönch aunz - ma listess na uschè lönch ch'el füss già ieu in schmanchaunza.

 

göri

05/2013

Ün'öglieda inavous                  

 

Dumengia saira, als 11 marz 2012, am es ieu tres il cho üna ponderaziun tuottafat nouva, per me revoluziunaria! "Oramai cha'd es sbandieu il prievel da gnir inundos cun quantiteds da fabricats inütils pudessi agüster mia veglia ideja cha gös olimpics sajan üna catastrofa per nossa bella cuntredgia. Gian Gilly ans explicha bain cha ün'olimpiada 2022 in Svizra, voul dir in Grischun, vegna be in dumanda scha's tuorna a gös simpels e cha mê pü nu saja da seguir il stizi da Putin al mer nair. Dimena: Per noss'unica industria, il turissem, pudess ün'olimpiada suot quistas nouvas circumstanzas propi esser da grand avantag. Reclama, infrastructura a lungia vista …

Uscheja tunaiva il cumanzamaint d'üna columna ch'eau vaiva publicho illa Quotidiana l'an passo. In quel artichel d'eiri però gnieu a la conclusiun ch'eau nu possa am fider dals turistikers perche cha quels – insembel cun bod tuot ils politikers grischuns – plandschaivan da l'iniziativa da Weber scu scha'l turissem grischun füss uossa pers per adüna. In tuottas manieras pruvaivane da tschercher daintists chi vessan gieu da trer ils daints agüzs da l'iniziativa. Insomma, els as vaivan miss ad ir üna tela cumpaschiun per lur collegas da l'industria da fabrica ch'els haun cumplettamaing survis che schanzas cha quell'iniziativa purtaiva güsta al turissem.

Uossa intaunt ho'l güdisch federel trat sentenzcha. E darcho rimbomba in tuot nos chantun ün blastemmöz sur da l'ingüstia da nossa güstia federela!

Cura inclegiarons in nos chantun cha'l turissem viva in prüma lingia da la bella cuntredgia e na dals fabricats ils pü schmasüros e vendieus our?

 

göri

04/2013

Rivo illa fosa sela.                  

 

Eau d'eira ieu aint il chesamaint inua cha's pudaiva s'inscriver per da tuotta sorts cuors, eau m'interessaiva per ün tema da la zardinaria, eau vulaiva imprender ad inchalamer bos-cha da frütta.

Rivo in suler d'he udieu vuschs a crusch ed a traviers ün plaun pü insü e sainza m'impisser bger d'he seguieu a quellas vuschs. Sül prüm plaun d'eiran duos portas ad ela ot ed aviertas, e cuaint staiva glieud chi d'eira apparaintamaing vi dad ün aperitiv u coctail. Ün camarier es dalum gnieu no eir tar me am dumander sch'eau vöglia vin alv u pü gugent süj d'orandscha u ova minerela, eir sfögliedas finas e buchedinas insaledas m'haune purto dalum davaunt il nes. Eau m'he inservieu cun gust e sun girumblo ün pô traunter tuot quella glieud.

Cun que ch'eau nu d'he cugnuschieu ad üngün suni ieu ün pô da passagi, bod tar üna gruppetta da damas immez la sela chi tadlaivan las teorias d'ün hom grand in vstieus elegants, bod tar ün tröppet pü pitschen chi staiva dasper la paraid e baderlaiva, bod eir tadland, fand finta da m'interesser per las teorias da duos homens pü vegls accumpagnos pü cu facil da lur duonnas. Bel d'eira cha'ls camariers gnivan adüna darcho ad implir il magöl e neir cullas maglioccarias squisitas nu gniva spargno. Poch a poch am sentivi uschè bain traunter quista glieud ch'eau füss bod sto pront da'm parteciper eir eau a lur discussiuns, schi cò riva tar mia uraglia la vusch düra dad ün hom: "…uossa stuvainsa be guarder cu cha pudains fer ir inavous quist >three eleven<. .." Quists duos pleds inglais m'haun strat our da mieu sömmi! Nun ho que nom "Nine eleven"? Que d'eira bain il di dals ündesch settember cur cha'ls eroplans svios da terrorists vaivan chalo ils grattatschels dschimels a New York? Nine eleven füss cler. Ma three eleven? Three eleven vuless dir in rumauntsch ils ündesch marz. Ündesch marz vaiva bain gieu lö la catastrofa in Giapun. Ma quist tip nu pera da discuorrer dal Giapun. Aunz ch'eau am vess gieu da masder aint il discuors per incler pü bain che ch'el managiaiva ho'l explicho svessa: "Que es incredibel cu cha'l pövel svizzer ho pudieu ir sülla colla a quists verds! Nus vains simplamaing durmieu, fat bger memma poch, nus ans stuvains svessa piglier pel nes. Uossa vainsa da metter tuot nos pais illa discussiun cu cha'd haun da gnir reglos ils detagls, que es simplamaing üna catastrofa sgrischaivla per nossa branscha…"

Aha, que stu esser ün congress da glieud our da la branscha da fabrica. Am pera bain ün pô blasfemic da congualer la decisiun democratica svizra cun ün attentat terroristic cun passa 3000 morts in America, ma per parts da la branscha da fabrica varo l'iniziativa propi tscherts effets catastrofels. Ma curius, d'he pondero inavaunt, dapertuot inua cha vaiva tadlo aunz nu'm paraiva cha la glieud gniss da la branscha da fabrica. Na, que d'eira tuot ün'otra branscha, lascha'm dumander be dret our: "Ch'El s-chüsa, signur", am d'he vout ad ün hom chi d'eira güsta be turno da's fer implir darcho sieu magöl. "Che disch El da quist congress cò?"

"Ah, que es üna buna chosa scha nus turisktikers svizzers ans inscuntrains per chatter soluziuns – il temp inua cha minchün guardaiva be sün sieu egen affer, es passo, per furtüna. L'imnatscha cunter nossa sparta vo uossa tres tuot las ..."

Bella quista, m'he impisso. Quecò es ün congress da turistikers ed els sun tutti quanti da l'ideja cha l'iniziativa da Weber saja sto üna catastrofa per lur branscha. Ils turistikers sun propi be pü ils servituors dal pussaunts fabricants, il turissem stess nu'ls interessa per ünguotta.

Sun sortieu pü svelt pussibel our da sela ed apaina rivo our dal chesamaint d'he spüdo sülla salascheda la bucheda da vin ch'eau nu d'eira pü sto bun da travuonder daspö quel "three eleven"melprüvo.

 

göri