il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2013

Eir il CHARDUN gratulescha                

 

Martin Bundi ha survgni il grand premi d’arcugnuschentscha dal chantun Grischun. E co ch’el ha merità quel. Martin Bundi ha dat gio daspö ün pêr ans seis mandats politics. El lavura però inavant illa perscrutaziun da l’istorgia da nos ambiaint alpin. El ha cumbinà dürant sia vita l’algordanza e’l respet dal passà cun quel da l’ingaschamaint i’ls affars publics actuals. Chi chi cugnuoscha il passà es eir preparà per müdar l’avegnir. Sco adüna pro tals premis, i s‘algorda be als dis da sulai. Ingün nun ha fat manzun a la resistenza politica cunter il giuven Martin Bundi. Pro sia candidatura pel cussagl naziunal vaiva dat debattas illa regenza grischuna, scha quist post saja cumpatibel cun sia professiun da magister al seminari. E candidà vaiva Martin Bundi eir per la regenza grischuna. Quels chi splattan hoz ils mans as vaivan dostats cun mans e peis a seis temp, ed i tils d’eira reuschi dad impedir ch’ün „cotschen“ dvainta regent. Uossa, ch’el ha acumpli ils 80 nun esa plü d’avair temma dad el, per ün post sül champ politic esa massa tard.

Martin Bundi nun es plü ün privel per la classa politica, uschè cha tuots pon applaudir!Il CHARDUN gratulescha a Martin Bundi eir per sia perseveranza i’l clima fraid da la politica grischuna.

 

Romedi Arquint

 

 

 

 

 

 

12/2013

Gratulaziuns dal Chardun eir ad

Angelo Andina             

 

Angelo Andina ha survgni ün premi da la Fundaziun Binding chi promouva progets da las domenas ambiaint, fuormaziun, cultura e la domena sociala da tuot la Svizra. Andina ha survgni il premi per seis grond ingaschamaint ill’Engiadina Bassa, sco chi scriva la Fundaziun. Sias iniziativas localas e regiunalas illa regiun perifera da las alps sajan ün exaimpel per tuot il territori alpin. Andina haja lantschà tanter oter iniziativas per rizzar aint ün fondo cumünal a favur da progets futurs, per metter ad ir la Bieraria da Tschlin, üna butia da cumün ed üna cultivaziun ecologica adequata per las terrassas. Cha Angelo Andina haja demonstrà cun seis agir chi saja pussibel da promouver ün svilup perdürant in regiuns periferas adonta da la gronda opposiziun. Il Chardun gratulescha a seis predschà collavuratur Angelo Andina per quist premi e giavüscha eir in avegnir perseveranza in seis ingaschamaint.

 

Baldina Cantieni Kobi