il Chardun

revista  rumantscha independenta

CH - 7559 Tschlin

fon 081 866 36 76

IBAN CH

12/2013

Chi mê es gnieu süll’ideja da pajer bonus als schefmeidis, scha faun BGERAS operaziuns? Vela per quella glieud listess princip scu tar las bancas: dapü schmerdsch = dapü boni? A favur da chi?

Richard P. , S.

  • D’heja let inandret, que cha tü hest scrit? Ma es que be pussibel? Scha’l schefmeidi fo bgeras operaziuns, schi’l ris-ch, ch’el fatscha fals dvainta sfurzedamaing viepü grand. Sgüra brich a favur dal paziaint!!! U? Dal rest: Il schefmeidi chi fo bgeras operaziuns surlascha – pera - ün pô da la ‘lavur’ eir a sieus assistents. Ma a nu m’es però cuntschaint sch’el parta lura eir ils boni cun els!

 

Hast let l’artichel da Jon Plouda “Fusiunar, schi o na?” aint illa Posta ladina dals 19 da december 2013 ? E che dist tü da la chosa?

Luzi N, B.

  • Eu di, cha quist artichel stuvess gnir let e ponderà a fuond da minchün chi s’occupa da fusiuns da cumüns, specialmaing da quels chi sun al timun. Per quels es quai ABSOLUTAMAING indispensabel!

 

Eu sun minchatant cuntaint d'avair la starvera, uschigliö am gess amo bler daplü sü pel nas. E che dist tü Giongion?

Peter Munz, S.

  • Scha quella impediss quai, ma...! Ma i vegnan fattas invant retscherchas reguard "la derivanza" da la starvera.

 

Lingua! Nun esa uschè, cha'ls mezs da massa stuvessan cultivar la lingua? Impè legia p. ex. "...arch in chel, e chanzuns da prümavaira. Varius ed avierts sun eir ils chantadurs".

Oscar D., P.

  • Scha quai füssan be fals da scriver, lura amo amo...(meis PC es eir legastheniker!). Ma i vegn eir discurrü uschè. Il bel cling dal "tsch" e da "dsch" va almain, apunta chel (pover bel arch in chel!) impè da tschêl etc. I's po eir dir, cha crappa sfenda cha "alch nu vaglia" inguotta , impè da vala...! Vagliar as vagliaiva ils morts! Insomma, da cultivar ün zich la lingua, quai nu vala (valair) plü inguotta!

 

La votaziun da las seguondas abitaziuns nun ho güdo ün starnüd. A vain fabricho inavant scu sch'ünguotta nu füss sto. U nun hest eir tü quist'impressiun?

Anna-Lea....

  • Schi a vain ed a gnaro surfabricho inavant, fin in etern, scu cha's soula dir, sainza s'impisser dal mel. Ma quist etern nu düraregia in etern.

 

 

 

 

 

 

 

10/2013

La Regenza grischuna vess gnü da's s-chüsar pro quels povers uffants plazzats (Verdingkinder) chi a seis temp d'eiran gnüts tuts davent da lur famiglia d'organisaziuns 'charitativas'. (SO dals 23 d'october) e plazzats in chasas da ricover o in famiglias. Blers da quels han gnü üna povra vita. I nun es pussibel da far bun quist agir inuman, ma i's pudess almain almain far il gest da's s-chüsar pro els. La Confederaziun ha fat quai, divers chantuns medemmamaing, ma nos 'nöbel' president da la regenza grischuna chatta, cha quai nu fetscha dabsögn.

"Er sollte sich schämen," scriva Reto Furter a la fin da seis commentar "Die Schande von Chur".

Trachsel vess gnü occasiun d'imprender as svarguognar: FAK, resgia da Domat, olimpiada etc. Ma ad el manca - para - cumplettamaing quista cumponenta da l'etica. Insomma, el es bainbod davent, e bun davent ch'el es. Che dist tü Giongion?

Gian Fadri M., Z-

  • Eu nun ha d'agiundscher inguotta.

 

Es quai propa il vaira, cha las Pro Idioms considereschan da dozar la contribuziun annuala dals commembebers da frs. 10.- a frs. 100.-?

Rico Verdet, P.

  • Quai nu'm es cuntschaint.

 

Avant blers blers ons publichaiva il CHARDUN üna tscherta - co lessa dir - 'critica linguistica' (bainvugliainta) da Max Kettnacker. El vaiva fadia da tolerar traducziuns verbalas dal tudais-ch in rumantsch, per uschedir 1:1.

"I nu crouda sü!", ma i dà in ögl "El do our üna pruna raps" per: el spenda bger e.u.i. Ma uossa es quista epidemia propa dvantada virulenta: "Hoz saira", "ir sur ils cudschs", "Eu vegn oura da quai , cha...", "da lo no...(lia! = dalòno), "Uossa esa da guardar co chi vegn miss intuorn" il memorandum."Quist möd da trattar la lingua "am chaja sü!".

Renato Marti, P.

  • Eir a mai! Ma... quel chi corregia as fa malvis!

 

 

 

 

 

08/2013

Id es ils 1. avuost, il di dals pleduns patriotics. Ueli Maurer va sü Breil (in Surselva e nöa Brail!) a tgnair il pled per la festa federala.

Cur ch'el es stat ultimamaing cun sias/seis collegas dal cussal federal a far lur spassegiada tradiziunala annuala i'l chantun dal president federal è'l i - sco chi tocca - i'l chantun da Turich. Ma quai chi'd es nouv es, ch'el til(la)s ha manà a spass per quai suot in ün char armà, ün uschedit "Schützenpanzer".

Che dist tü da quai? Per ir a Breil s'inserva'l faquint d'ün helicopter – per gnir sco ün anguel giò da tschêl e benedir cun emfasa la raspada patriotica.

Gertrud A., S.

  • Cha quai es da pac bun gust. El nu guardarà a la televisiun mai las demonstraziuns da quels pövels chi cumbattan per daplü democrazia e vegnan miss a püt – apunta – tanter oter eir cun… tancs. Malavita han tuots e tuottas acceptà da far la ‚spassegiada corazzada'.
    Eu vess spettà, cha almain la cusgliera Sommaruga vess refüsà quist invid, sco cha a seis temp ün magister ‚renitent' vaiva refüsà d'accumpagnar a seis scolar ad üna revista da l'armada a Cuoira (statta prescritta dal Departamaint d'educaziun).

 

 

 

 

 

07/2013

Il Cussagl federal ha relaschà ultimamaing il sböz per la ledscha reguard las seguondas abitaziuns (votumaziun federala dals 3 da marz 2012 – quella da la clausla dals 20%!) cha'l pövel ha acceptà cun gronda magiuranza). Plü noscha nu pudess ella esser, quista proposta d'execuziun. Quai es propa ün tradimaint dal suveran, üna marscha varguogna! Quist sböz va uossa in consultaziun pro'ls chantuns. Quels chantuns da muntogna tschüffan implü amo 200 milliuns francs - per chi possan fabrichar inavant seguondas abitaziuns. Ma nun es quist pervers, ün s-chandel, insomma? O che dist tü Giongion?

Richard P. , S

  • Che voust ch'eu dschaja! Ün s-chandel, schi! Vargogna e vituperi. Ma scha l'uschedit pövel o suveran nu's dosta, schi merita'l propa, cha nos bel pajais vegna surfabrichà.
    Nus stuvaran ünsacura eir nus ir oura sün via a demonstrar!
    Id es nempe plü co evidaint, cha la politica sta cumplettamaing suot la tutela da l'economia.

 

Nu fa quai mal las uraglias eir a tai, scha uossa eir ils Rumantschs accentuescha bod adüna la prüma silba d'ün pled: Martin, Duri (scha pussibel dafatta Turi!), Dumeng, ecologic, libertà, …etc.

Anna Ursina M.

  • Schi, schi! Ma eu nu correg plü!

 

Ma nu't fa quai üna gronda malavita chi piglian uossa mincha aua da las vals lateralas per ouvrettas electricas?

Arnold N., Z.

  • Üna gronda malavita. Scha quellas rendessan almain als cumüns. Ma perits in chosa dubiteschan da quai. Insomma, i sto gnir devastà tuot - a tuot cuost! Ed i pretendan sfruntadamaing, chi nu detta ingüna alternativa.
    Bella quista! Ingüna alternativa? – spargnar e far spargnar!
    Armon Planta vaiva dit fingià a seis temp: "A mincha auina – sia turbina!" .

05/2013

Per gnir fleurista n'haja gnü da far ün giarsunadi e – per glivrar – ün examen. Che cha quels han tuot vuglü savair da mai: noms da fluors a l'infinit. Uossa voul meis ami ir aint illa politica. Han insè eir ils politikers da far ün examen?

Natascha Bert, S

  • Da quai ch'eu sa – brich. Ils blers saran sàpredestinats per far politica. Scha tü vast üna jada sün üna tribüna aint in ün parlamaint, schi vainst tü forsa a dubitar ch'ün o tschel vess tschüf il diplom per far da politiker.

 

Esa da dir da s c h i o da n a als 9 da gün in quai chi concerna la tscherna dals cusgliers federals tras il pövel?

Flavio P., P.

  • I sta liber a tai da dir schi o na, ma ponderescha las consequenzas cha quai pudess avair. Champognas elctoralas a l'infinit…a l' infinit…a l'infinit…. E tschernü nu gniss garanti na adüna l'optimal, forsa plüchöntsch il ‚optigal'! (Migros)

04/2013

Giongion respuonda dumonda Il Trachsel pretenda in üna Tribuna Politica aint illa Quotidiana dals 15-2-2013 dal Grischun …dapli che mediocritad". Quist es adressà a quels chi han dit da na a l'olympiada. Nun es que üna impertinenza, da pretender, cha tuot quels 53% Grischuns sajan mediokers, pretenda'l indirectamaing. Quai es ferm tabac. O?

Fadri Ernest., B

  • Dad el (ma nu dir tuottüna brich be ‚Il Trachsel'!) chi'd es talmaing superiur als solits povers margnacs – sco cumprovà, baininclet! – nu poust spettar oter.

 

Minder ha scrit: "Wir müssen aufhören, alt Bundesräte durchzufüttern.". E co staja cun noss cusgliers guvernativs?

Anna Patrizia

  • Perche nu dumondast tü directamaing a la chanzlia chantunala? S'inclegia ch'els tschüffan eir els l'AVS. Implü pon els, davo ch'els sun sortits da la Regenza, surtour mandats da cusgliers administrativs.

 

Es quai indispensabel, cha la Svizra cumpra quists Grippens dal trenta?

Armon Menduri, S.

  • Uschè indispensabel sco ün s u r ö s s !

 

La "Denkfabrik Avenir Suisse" chi pensa –para - per tuot la Svizra fa la proposta d'üna multa per gestiuns gastronomicas chi retiran lur persunal da l'ester. Horca, scha quels san pensar! Per mai fana meglder da nu pensar!

Heinrich Buol, A

  • Eir eu n'ha gnü let quai e n'ha be squassà mia plufra, totla testa.