11/2013

paca spranza...              

 

Avant cuort es morta Brooks Greenberg ill'età da 20 ons. Il particular vi da quista duonna giuvna d'eira, ch'ella portvaiva il sindrom X, ün defet da gens cun üna DNA singulara. Ella portaiva in sai la giuventüna eterna. Pro la mort masüraiva ella 73 cm e'l svilup dal corp e dal far correspuondaiva ad ün'età da duos ons. Ella ha survivü diversas greivas malatias da plüs organs. Natüralmaing cha quist cas interessaiva a la scienza fingià dürant la vita da Brooks. Il böt es natüralmaing quel, da scuvrir la mutaziun dal gen e da manipular quel da möd, cha l'industria da chemia possa sviuppar ün'auina, l'auina da la vita eterna. Fin cha quai es uschè inavant sto però gnir scholt amo ün problemin. Tscherts organs e l'ossa creschan irregularmaing, intant cha'l svilup dal tscharvè es retardà.

Suppuonin uossa il seguaint cas: Eir eu toc bainbod pro'ls seniors e quai am fa tantüna ün pà pissers. Difficultats culla memoria e qua e là s'annunzcha ün o tschel organ cun üna zuccadina. E la vezzüda pretenda ögliers. Uossa svelt in apoteca e cumprar l'auina. Baiver quella in üna tratta, e'l gen es installà. Quasi sco l'installaziun d'ün program cunter virus sül computer. Da sperar esa be, cha las cellas dal tscharvè vegnan eir renovadas e reduplichadas. Uschinà nu füssa gnanca bun da m'imaginar a chi cha quai güda, sch'eu n'ha ragiunt la vita eterna.

 

CASA

 

 

 

 

 

 

08/2013

La Cassandra solitaria                  

 

Alexander J. Seiler, ün cuntschaint publizist svizzer ed autur da films, ha accumpli avant cuort 85 ons. El d’eira ün cumpogn da viadi da Max Frisch. Tuots duos filosofs solitaris i’l desert. In occasiun da seis 85 avel anniversari ha Seiler declerà, perche ch’el nu publichescha plü ingüns films e texts: “Eu nun ha ingüna vöglia, da star quia sco “Cassandra solitaria”. Il muond as rechatta in ün tal stadi desolat cha taschair saja l’unica reacziun adattada. Cassandra d’eira üna figüra tragica da la mitologia antica, chi vzaiva adüna ouravant il fatal, nu chattaiva però mai l’udida.

E quai nun ha dachefar nüglia cun pessimissem. Pessimissem es üna opiniun da viver cun üna tenuta fundamentala sainza aspettativas positivas e spranzas.

 

Il muond as rechatta sainz’oter in ün stadi desolat. Ed i vain taschü – e quai es il grond problem da nossa società moderna. Taschair nun es l’arma cunter il pessimissem, il taschair provochescha apunto la situaziun disperada. Mincha cumbatta es in quel sen ün act optimistic.

 

CASA

 

 

 

 

 

 

07/2013

Stà                 

 

La stà es impustüt il temp da vacanzas. La fin d'eivna dals 13/14 lügl ha gnü la plazza aviatica a Kloten passa 250'000 passagers dad aviuns. Uossa daja be üna: bandunar uschè svelt sco pussibel la patria e tancar las battarias – e sco fenomen secundari: Portar a chasa amo ün pêr virus e davo star ün pêr dis in let cun grippa. La cuolpa sun ils indrizs da climatisaziun i'ls hotels ed i'ls aviuns.

Il temp da stà es eir il temp sainza televisiun rumantscha. Ingün telesguard sül emmettur da meis computer. E la pagina d'internet dal RTR admonischa: "Grond privel d'incendis da guaud in Engiadina Bassa"! Quai, adonta chi ha dat i''ls ultims 3 dis temporals cun blera plövgia. Il temp da stà es però eir il temp, cur cha nus gnin a savair robas fich importantas:

  • Mincha di il stadi il plü actual reguard il "royal baby", la raïna o'l rai futur da la Gronda Bretagna. Uossa dvainta eir la raïna Elizabeth malpazchainta. Ella s'exprima fingià ün pà nervusa illas gazettas inglaisas: "Eu speresch, cha l'uffant gnia bainbod, eu less ir in vacanzas.". E povra Kate es ferm suot squitsch. Ma la pressa da boulvard tilla güda cun buns recepts: Lavar sü il fond (ils drets movimaints) o sex (stimulescha la madra) – sperain cha William Wales saja güsta disponibel….

  • In vacanzas laiva ir eir nossa cusgliera guvernativa Barbara Janom – e quai in Egipta ingio cha'ls umans cumbattan ün cunter tschel in üna guerra interna. Massa privlus – e quai intimescha a la gazetta "Südostschweiz" da declerar sün ün'intera pagina, perche cha duonna Barbara ha desisti da quista destinaziun. Ingün nun es però gnü a savair, chenün lö cha la cusgliera guvernativa ha uossa tschernü. Forsa sia patria in Engiadina Bassa. Ün lö sainza privels – uossa cha l'uors nun es qua.

  • E qua füss amo Daniel Vasella, voul dir ils 25'000 dollars ch'el survain per ün di da cussagliaziun pro la Novartis, seis anteriur patrun da lavur. La Novartis sto vender ca. 2'500 troclas dal medicamaint NeoCitran per pudair pajar quist honorar modest. Ma quai nun es ingün problem. Scha be 1 % da quels 250'000 chi sun partits in vacanzas i'l weekend manzunà tuornan cun grippa, alura es l'investiziun fingià amortisada, dimena ingün problem!

 

E Friedrich Nietzsche ha scrit l'on 1887 davent da seis lö da vacanzas a Segl ad ün amih: "Meis char cumpogn. Che stà! Eu Til pens tschantà in mia stanza, daplü omletta sco uman".

 

CASA

06/2013

Reverenza svizzra a la China                

 

Dürant la visita dal prüm minister chinais a Berna ha il Cussagl federal accentuà l'importanza d'ün access privilegià da la Svizra a l'economia chinaisa. Vuschs ciriticas sco p.ex. las demonstraziuns dals Tibetans nu d'eiran perquai giavüschadas.

Il directur da la pulizia bernaisa ha manzunà, cha l'expressiun libra da l'opiniun saja bainschi da proteger, pel mumaint saja però la suottascripziun da la cunvegna dal marchà liber plü importanta.

 

Vender la nona per ragiundscher bunas cundiziuns pel marchà cun l'Imperi d'Immez chi s'impipa da drets umans, da reglas dal marchà liber, da la protecziun da l'ambiaint, quai tuot a favur da la creschentscha da l'economia. E per cha l'economia crescha eir inavant pro nus faja dabsögn da bunas relaziuns cun l'economina chinaisa.

 

Forsa cha'l directur da la pulizia bernaisas as referischa a la regla chinaisa, cha ün funcziunari local vain valütà in prüma lingia in basa a seis success economic. Success economics sun in cas da dubi plü importants sco la protecziun da mincha singul in reguard als drets umans.

 

Voilà la conferma da la regla moderna da l'economia: Nus surpassain sainza scrupels las reglas umanas a favur dal standart da vita schmasürà! Na be illas relaziuns cun la China. Las nonas ston far attenziun: Ellas vegnan vendüdas eir in blers oters cas! In princip vaja eir quia per la definiziun dal pled "bainstar". E bainstar vain hozindi in nossa cultura in nom da Dieu collià cul success economic e monetari. Ingio es dimena il problem?

 

CASA

05/2013

Svizra umanitara?                 

 

L'on 2012 sun entradas 24'941 dumondas per asil in Svizra. 2507 (11.7 % !) persunas han survgni asil, quai voul dir, quistas persunas survgnan ün permiss da dmura e pon eir lavurar sch'ellas chattan ün patrun da lavur chi tillas impieghescha. Tuot tschel(la)s petent(a)s ston darcheu bandunar la Svizra. 12'876 persunas estras sun gnüdas be in schner 2012 per lavurar in Svizra.

Quista glieud nun es perseguitada in lur patria. In congual cun quistas cifras sun ils "asilants" ün pitschen pertschient. Daspö cha la guerra civila illa Siria ha cumanzà sun passa 2 milliuns persunas mütschidas our da lur patria per ir in pajais cunfinants, impustüt in Türchia. Sco scha quels pajais nu vessan fingià svessa avuonda problems, chatta la glieud quia agüd, per part - s'inclegia - suot cundiziuns catastrofalas.

Congualà cun quistas cifras es il numer da fügitivs in Svizra üna miclina. Ma per la paja ün dals temas ils plü gronds illa politica da la Svizra. Uossa voul üna ledscha nouva s-chaffir reglas amo plü restrictivas per glieud chi voul dumandar asil in Svizra. Als 9 gün 2013 vain suottamissa a la populaziun la ledscha nouva. Refüsar il servezzan militar nu dess plü valair sco motiv per survgnir asil in Svirzra. Ultra da quai nu pudessan dumondas per asil plü gnir inoltradas pro'l consulats svizzers i'l pajais correspundent. Da quista masüra patissan impustüt duonnas ed uffants. Las vistas, cha la populaziun nun accepta la ledscha nouva es pitschna. "Asilants" es dvantà pro no ün'insulta. Üna Svizra umanitara?

1/1

Fin cha las dumondas d'asil in Svizra vegnan trattadas han ils fügitivs il dret da star quia, quai però sainza ingüns drets e sainza pudair lavurar. La Confederaziun tschercha lös per dar allogi als fügitivs. Ün lö as rechatta tanter oter in ün hotel a Laax. Il Chantun voul tour a fit quel stablimaint ma a Laax as fuorma gronda opposiziun e la radunanza cumünala ha concess ün credit per pudair cumprar l'hotel, quai cun gronda magiurità. Il Chantun ha però ün dret da precumprita e nu voul desister da quel. Guardaina co chi finischa la storia… Quai chi dà da pensar sun ils motivs da quellas e quels da Laax per lur tenuta negativa. "Ils asilants disturban a nos turists e nus vivain dal turissem", "I's sà tantüna da che glieud chi's tratta pro'ls asilants. Ils blers sun criminals" e.u.i. Id es üna tristezza chi'm tschüffa a dudir da quels motivs. Il punct chi am deprimescha il plü ferm es però il motiv ufficial da las instanzas politicas dal cumün a man da la radunanza: L'hotel dess gnir cumprà per pudair offrir daplü lets chods. Il motiv es dimena la mancanza da lets d'hotel e na l'aversiun cunter asilants. Üna spezcha da cinissem. L'umanità as mouva vers ils precipizis!

 

CASA

il Chardun

revista  rumantscha independenta

CH - 7559 Tschlin

fon 081 866 36 76

IBAN CH