il Chardun

revista  rumantscha independenta

CH - 7559 Tschlin

fon 081 866 36 76

IBAN CH

03/2013

Il resultat da la votaziun davart Olimpia saja „Ein klares Misstrauensvotum der Basis an die da oben“ as ho pudieu ler in ün commentar da la SO. Quista discrepanza traunter ils politikers e la populaziun es gnida tematiseda püssas voutas zieva las votaziuns dals 3 marz. Il motiv da quista disfidaunza es il seguaint:

Il Grand cussagl vain elet eir in avegnir seguond il sistem da majorz, la situaziun politica resta dunque la listessa. Dals 120 grandcusgliers sun be 13 socieldemocrats e verds üngüns. Il parlamaint a Cuira es i’ls mauns dals partieus burgais. Els cumandan las festas. Els nun haun da piglier resguards süll’opposiziun. Üna cultura da discussiun nu fo dabsögn. Els haun e mantegnan la pussaunza, els sun persvas da savair che chi’d es bun pels Grischuns causa ch’els nu vegnan confruntos ferm avuonda cun idejas oppostas.

A la populaziun chi nun es perincletta culla politica dal parlamaint grischun nu resta oter cu da s’unir cullas organisaziuns da protecziun, culla Pro Natura, il WWF ed eir cul Chardun. Ils singuls votants e las singulas votantas chi nu sun commembers d‘ün partieu ma chi sun listess politicamaing activs e chi as saintan sulets cun lur opiniun divergenta chattan tar las organisaziuns da protecziun il sustegn necessari. Els badan cha’d existan eir otras persunas chi sun da lur avis ed els sun cun que eir pronts da fer opposiziun. Perque sun gnieus sbüttos l’ultim temp püs progets politics cha’l Grand cussagl eira persvas da fer ir tres.

Il „Misstrauen der Basis an die da oben“ giarò inavaunt causa cha’l pövel grischun ho darcho refüso l’iniziativa da proporz. Pussibelmaing haun pudieu fer ils promoturs dal proporz - chi eiran al listess mumaint eir ils adversaris da gös olimpics – memma pocha propaganda pel sistem da proporz. Per tuot nun ho que tandschieu ne tar las finanzas ne tal „persunel“. Ed impedir gös olimpics eira in quista situaziun pü urgiaint.

 

Baldina Cantieni Kobi