02/2014

La democrazia es stantusa                 

 

A : Nus vaivans uschè ün bun proget, uschè perfet! Tuot d'eira previs, mincha detagl füss ieu sü! Las staunzas da chüra, ils locals da cumpagnia, la vista our süllas muntagnas: Muottas Muragl, Palü, Tschierva, Rosatsch, l'ospidel be daspera, tuot füss sto stupend. Ed ün edifizi chi vess fat parada! Ma na, quists stüpids vaun e frizzan sü a tuot la populaziun cunter nos bel proget, ad haun fat telmaing cha quel stuaiva ir giò per l'assa.

 

B: Forsa vessas fat bain da piglier in vossa cumischiun eir ün u l'oter dals adversaris. Anzi, insè vessas gieu da pretender cha qualchün dad els as mettess a dispo…

 

A: Est nar? Quels idiots vessan ruino nos proget da bel e princip, cun quels nu poust discuorrer, quels nun inclegian radschun.

 

B: Ma sest, forsa illa cumischiun as vessane avierts per voss buns argumaints…? Scha s'ho invista i'ls detagls as inclegia forsa listess dapü?

 

A: Füss auncha la pü bella cha vessans piglio illa cumischiun da l'ospidel ad ün da quists calfacters u scha vo bain dafatta a quella tschiguolla cha'ns vulaivan chatscher sü!

 

B: Ah? Els füssan stos pronts da fer part a las cumischiuns preparatorias?

 

A: Cler, quists stüpids, già cur cha sun gnieus tschernieus, già illa prüma tschanteda s'haune fichos sü ed haun pretais, impertinents, cha nus ils stöglians resguarder illas cumischiuns, ma lo s'haune sbaglios, na na, scha quels crajan…

 

B: Ma, ed uossa, che fais? Ad es bain urgiaint da fer qualchosa per la glieud chi ho bsögn da chüra? Quecò vais dit eir vus in minchün da vos inserats.

 

A: Uossa? Uossa paune sufler. Chi chi nun ho vulieu ho gieu. Uossa nu fainsa pü strich. Uossa guardains tuot il pü da fer ün pêr miserabels flics chi cuostan pü bger pussibel giò Promulins - e scha mê pussibel cun grand retard, alura vezza la populaziun forsa aint plaunet che sbagl cha faun scha vaun adüna sülla colla a quists stüpids da la glista libra.

 

göri

il Chardun

revista  rumantscha independenta

CH - 7559 Tschlin

fon 081 866 36 76

IBAN CH