il Chardun

revista  rumantscha independenta

CH - 7559 Tschlin

fon 081 866 36 76

IBAN CH

02/2014

Davo la votumaziun la digestiun             

 

Eu nu sa da chapir perche cha la magiurità dals Svizzers e da las Svizras han dit da schi a quista initiativa dal PPS.

 

Mo ... forsa pervia chi nu vöglian cha meidis esters specialisats taglian sü ils vainters dals bravs Svizzers o forsa tils va quai cunter il strich scha Ali il servunz dal Crusch Alba chi nu sa amo uschè bain nossa lingua serva il plain in pigna. O forsa han els eir pensà cha tuot quists turists sajan da massa perche quels piglian tantüna davent las plazzas aint ils trens, implischan las pistas da skis, stan davant nossas bellas muntognas a sulai, piglian noss francs svizzers our dals automats, mangian nossa tschiculatta e baivan nossa biera. Eu craj propi cha'ls blers chi han dit da schi nun hajan propi na badà da che chi's tratta.

 

Mo bain in avegnir mangiaran nus be svessa noss fondues. Noss cunfins saran survagliats e serrats. Ils gripens svolaran di e not sur il Piz Lad via e nan. Ils Svizzers, lavurius sco chi sun, fabricharan darcheu svessa lur chasinas. No insömgiaran darcheu sco cha Heidi e'l bazegner (Oehi) stan davant la chamonna e mangian la tschiculatta da Sprüngli insembel cun ün bun toc chaschöl dal Emmental. Che idillic cha tuot sarà darcheu.

 

Mo chi sa, forsa hana eir ün zich radschun perche eu am dumond eir chi chi dovra quist'Uniun europeica schi's po avair la China sco partenari e confederà. Quels sun bain eir ün pövel chi chatta daspö tschientiners cha tuot quai ester saja suspect - pigliond oura il commerzi cun devisas.

 

Giovannina T. Tschlin