il Chardun

revista  rumantscha independenta

CH - 7559 Tschlin

fon 081 866 36 76

IBAN CH

03/2014

Binderas              

 

Binderas – eau m’algord cha nus guardaivans intuorn sün nossas gitas scha’s vzess da qualche varts üna bindera. Perche cha lo inua cha sventulaiva üna bindera eira ün restorant e nus füssans ieus gugent in ustaria. Ma pel solit giaivans be dasperavi causa cha pudaivans baiver our da la clocha cha vaivans aint in nossa buscha. Illas vschinaunchas gnivan e vegnan pendidas oura las binderas als dis da festa. Confederaziun, chantuns e vschinaunchas haun lur egens reglamaints chi dian cura, inua e quaunt lönch cha chenünas binderas dessan sventuler. A privats vain eir suvenz arcumando dad orner in möd festiv lur chesas, abitaziuns u üerts cun binderas specielmaing als 1. avuost, il di da la festa naziunela.

A pera bod scu scha pender oura binderas nu saja hoz pü moda. Almain in Engiadin’Ota as vezza viepü d’inrer binderas als 1. avuost.

Tar üna part dad esters da sur 30% nu saun ün terz da la populaziun perche ch’els dessan metter oura üna bindera svizra. Tar üna part da seguondas abitaziuns da 60-80% sun bgers üschöls serros als 1. avuost ed a tuottavia nun es il metter oura binderas vi da las forzettas da seguondas abitaziun üna da las lezchas dals pedels. Per la peja vainsa hozindi otras tailas in vschinauncha: banderolas da reclama. Quellas sventuleschan davaunt butias da mangiativas e da sport, davaunt hotels e restorants, davaunt firmas d’immobiglias – simplamaing lo inua ch’ün affer voul attrer l’attenziun. A nu giouva neir üngüna rolla scha l’affer es in possess ester u svizzer.

Tuottüna: tal center da sport Mulets a Silvaplauna sventuleschan amenduos tailas – superbgia naziunela e commerzi paschaivelmaing üna sper l’otra e praticamaing adüna, eir cur cha’l restorant es serro. Que nu fo ünguotta perche hoz nu so sà pü bod üngün cha üna bindera pudess significher cha l’ustaria es avierta….

 

Katharina von Salis /tr.