il Chardun

revista  rumantscha independenta

CH - 7559 Tschlin

fon 081 866 36 76

IBAN CH

03/2014

Implanter violas in marz?           

 

Nus vains in vschinauncha üna grandiusa butia da mangiativas. Tuots, esters ed indigens sun inchantos da la granda schelta e dals prodots fras-chs cha’s po cumprer lo. S’imaginè be, principi marz venda nossa butia ses differentas sorts da tomatas ma eir frejas, ampas, uzuns, rabarber e tuot il rest da la verdüra e frütta. Melavita vulaiv’eau fer gibuset, per bun rumauntsch as dschessa Rosenkohl. Impussibel da chatter quista verdüra traunter tuot quella schelta. Gibuset es tuottüna ün prodot d’inviern d’heja penso e d’he dumando a la vendedra, sch’els nun hegian…

„Nus vains be que cha la centrela trametta, nus nu pudains influenzer que cha la centrela trametta, que ans dischplescha“.

D’he lura cumpro gibuset dschait, l’eira eir tuot in uorden.

Hoz, il di zieva il maraton es a tuottavia proruotta la prümavaira. Nossa butia venda nempe violas in tuot las culuors, harassas plainas violas blovas, alvas, cotschnas, melnas. Il pês es be ch’ellas laschan già pender il cho, a varegian survgnieu memma poch’ova sur dumengia ma forsa sun ellas eir già ün’eivna intera in butia e spettan süls cumpreders chi vulessan las implanter. Eau nu d’he dumando a la vendedra perche ch’els vendan già violas, la resposta vaiv’eau già survgnieu tal gibuset.

Ils computers nu sun simplamaing na a l’otezza. Ma forsa es que pü bunmarcho da trametter violas in üna cuntredgia d’inviern cu da lascher indicher a mincha singula butia che prodots ch’els vöglian vender. A füss da programmer il computer da möd ch’el savess interpreter fotografias, p.ex. fotografias chi muossan cha in Engiadin’Ota cumainzan pür a prüjr las saivas e‘l terrain es auncha suot üna vetta da naiv dad 1 meter e mez.

 

Baldina

 

 

 

 

 

 

01/2014

Christoph Marthaler es ün redschissur da renom. El es sto ün pêr ans eir al teater da Turich ma ils Zürigais nun haun predscho sieu stil e sia lavur da redschia. Illa televisiun svizra sun scu adüna gnidas mussedas las scenas las pü haiklas e per glivrer haun ils "Bünzlis" da Turich spedieu a Christoph Marthaler. Uossa lavura el in differentas chapitêlas mundielas. Eau admir la lavur da Marthaler. El ho üna gruppa dad actuors, traunter quels es eir Jürg Kienberger da Segl. Tuot sieus actuors sun vairs acrobats ed in speciel fich buns chantaduors. Marthaler es vairamaing flötist professiunel ed eir ballarin. In tuot sieus teaters vain chanto fich bger e que in möd ourdvart musical e perfet. Grandius per tadler. Oters redschissurs haun copcho a Marthaler. Eir oters redschissurs faun chanter als actuors ma que nu tuna mê usche perfet e bel, que as tratta be da noschas copchas.

Ün oter artist ch'eau admir es Peter Leisinger da Malans chi fo sculpturas our da lain. Per me es que cha Leisinger fo vaira art. Perche ch'eau scriv tuot quist? Tuot quist es vairamaing be üna introducziun: Aint illa Engadinerpost dals 28 december sun aint fotografias da sculpturas da lain chi sun gnidas pustedas sper il Engadin Airport a Samedan. Üna disch,"allegra" (cler) e l'otra disch:"arevair" (cler). Cha que as tratta da Heidi e dal Schellenursli, as po ler aint illa EP. Cha per bgers giasts sajan Heidi e'l Schellenursli il prüm contact culla regiun e ch'els dessan gnir bivgnantos in ün möd speciel, ho pera declaro il mneder da comunicaziun dal Engadin Airport, Andrea Parolini.

Per dir be cun Vus, eau am trupag our ils ögls cha quistas duos figüras poch originelas dessan esser la prüma impreschiun cha noss giasts survegnan da nus! Suotvart pudais Vus congualer il Schellenursli cun üna figüra da Leisinger!

 

Baldina