03/2014

Tschernas                   

 

Ün fenomen cha pudains adüna darcho observer in Svizra es il fat cha que do suvenz üna discrepanza traunter ils resultats da votaziuns sur dad affers specifics e tschernas.

Uscheja es que pussibel cha ün partieu, ultimamaing p.ex il PPS, es l’unic chi sustegna ün’iniziativa speciela e zieva es sto ün miel dapü cu la mited dals votants e da las votantas chi ho sustgnieu l’ideja da quist partieu. Tuottüna nun haun zieva in generel las persunas proponidas da quel partieu dapü schanzas da gnir tschernidas. U auncha pü actuel es il cas tar las tschernas circuitelas in Engiadin’Ota inua cha’l Partieu liberel (chi vaiva exclus da prüm’inno mincha otra varianta cu quella da fer ün enorm chesamaint da chüra davous l’ospidel) ho gieu ün bel success tar las tschernas cuort zieva cha’l pövel vaiva sbanco cun üna magiurited da bod duos terzs lur concept da chüra.

Que voul dir cha’ls votants e las votantas sun bunas da fer üna differenza traunter üna singula chosa ed üna tenuta generela.

D’üna vart muossa quecò ün’independenza i’l möd da ponderer da la glieud chi fo plaschair. Da l’otra vart esa da’s dumander scha la glieud nu fess bain da consulter ün pô pü precis che cha lur politikers e politicras predilettas sustegnan e che ch’ellas sbüttan aint ils gremis inua ch’ellas sun gnidas tschernidas. Las graficas cha’s po hozindi chatter sur da votaziuns fattas p.ex. aint il cussagl naziunel u aint il cussagl dals stedis füssan cò ün zuond bun agüd.

Alura vzessi forsa dandettamaing cha quella persuna ch’eau d’he tschernieu ho in bod tuot las singulas fatschendas vuscho cuntrariamaing a mia ideja persunela. La consequenza pudess esser ch’eau, tar las prosmas tschernas barattess our quella persuna cun ün’otra chi, scha vo bain, füss dafatta dad ün oter partieu cu mieu predilet! Pudess esser cha alura vessan pü pochs da nus da plaundscher mincha mumaint «ils politikers guardan be che chi cunvain ad els» ubain «ah, la politica es listess be üna merda»…

 

göri

il Chardun

revista  rumantscha independenta

CH - 7559 Tschlin

fon 081 866 36 76

IBAN CH