Maglia merda

Portugal. Il secretari da stadi laiva impedir – our da motivs politics – il premi da litteratura european per José Saramago – til strichand da la glista dal nominats. Sün quai es Saramago – davo üna lunga istorgia da ümigliaziuns – emigrà in Spagna. Ed ha tschüf là 1998 il premi Nobel.

El ha fabrichà üna chasina, na plü gronda sco las otras, ed üna biblioteca cun millas da cudeschs. Ils cudeschs cha duonnas han scrit han tschüf üna plazza d’onur, in vicinanza da sia scrivania, per na laschar dschelar las auturas tanter ils homens chi han ris dad ellas o ingorà o exclus.

Saramgo, quist grand seigneur fin cul cour dad or – ed eir ün pêr varts problematicas, cler – ha dat ün lö protet ad ellas, forsa, perche cha el ha experienzà svessa co cha oters defineschan chi chi’s es.

José de Sousa deriva dad üna famiglia sainza possess, ils genituors analfabets, il nom «Saramago» ha miss pro ün funcziuinari dal stadi zivil, a quists «maglia merdas», be uschè, badà ha José quai pür cur cha el stuvaiva muossar cun set ons la carta d’identità, per pudair ir a scoula.

Saramago voul dir per portugais ravanel sulvadi, nudritüra dals povers, ün program. José ha acceptà il nom.

Sco nom de plume e de guerre.